Fifamoivoizana

Raha araka ny fantatra dia tokony handeha hiazo ny lalam-pirenena faharoa any Toamasina ity fiarabe ity no simba tampoka. Nisy namaha ny seletin’ilay fiara hoy ny mpamiliny ka tsy afa-nanoatra izy sy ny mpanampy azy ; izay no nahatonga ilay vatabeny mibaby ny « remorque » tsy voafehy intsony lasa nibahan-dalana. Naharitra ora telo teo ho eo ny fitohanana vokatr’izany izay efa tena lava dia lava tokoa. Lasa niodina tany Itaosy nivoaka an’Anosimasina ny ankamaroan’ireo mpampiasa lalana noho izany. Ny Taxi be mampitohy an’Anosy sy Fenoarivo ohatra dia nandray ny digin’Anosipatrana rehefa tafavoaka avy any Anosibe dia miditra an’Ampasika dia miodina indray any avarabohitra Itaosy izay vao miakatra an’Ampitatafika.Tsy nifankahitana ny fitohanan’ny fiara tamin’ny lalana rehetra mifandray amin’Itaosy sy Avarabohitra ary Ampitatafika omaly maraina tontolo. Maro ireo nisafidy ny nadeha an-tongotra, nisy indray ireo voatery nandeha lakana niampita mihitsy ka nahatratra 400 Ar ny saran-dalan’ny olona iray raha 200 Ar izany teo aloha. Niely mihitsy moa ny feo tamin’io andron’ny omaly io fa nianjera ny tetezan’Anosizato, antony niteraka fikoropahana, izay vao miha nampikorontana sy nampitombo ny fitohanana ka nanosika ny ministeran’ny asa vaventy hijery akaiky ny zava-nisy marina.Tsy nisy tetezana tapaka na nihotsaka izany fa ilay fiarabe nibahana no nahatonga ny fitohanana.