Fifamoivoizana

Mbola fitokonana fanairana ihany anefa, fa hivadika ho grevy faobe ho an’ny kamio mpitatitra manerana ny Nosy, raha tsy misy ny vahaolana. Manome fe-potoana 5 andro noho izany ireo fiara mpitatitra entana, mitaky vahaolana mivaingana, toy ny fitrongisana ireo làlana tena ratsy be, arahin’ny fanamboarana aorian’izay satria betsaka ny voka-dratsin’ny làlan-dratsy: loza, fahasimbana, fitomboan’ny fandaniana solika,… Nilaza moa izy ireo, fa tsy hanararaotra, fa mba mangataka valin-teny ao anatin’izay 5 andro, mba ahafahan’izy ireo miasa. Mangataka ny tsy handalovana “station de pesage” ihany koa aloha izy ireo mandra-pisian’ny vahaolana. Ny piesy lafo, ny solika iaraha-mahalala fa efa niakatra, izay isan’ny mamaritra ny vidin’entana ilaina amin’ny andavanandro satria tsy maintsy any no manarina ny fatiantoka amin’ny ankampobeny. Tena miantraika amin’ny any anaty vilanin’ny vahoaka noho izany ny fahasimban’ny làlana. Ny herinandro lasa teo kosa no nilaza ny Minisitry ny asa vaventy Jerry Hatrefindrazana fa hanomboka ny 15 febroary 2023 ny fanamboarana ny RN2, izay nolazaina fa tsy namokatra ny tolo-bidy nalefa teo aloha ka haverina. Nolazaina fa hamboarina avokoa ny RN2, RN4, RN7,… izay tsy vao izao no nandrenesana fampanantenana fa ny vokany mbola poakaty hatreto. Tetsy andaniny, momba ny famatsiana entana, nilaza ny Minisiteran’ny varotra tamin’ny alalan’ny Talen’ny varotra anatiny Atoa Andry Andriamahefa, fa mbola tsy misy atahorana ny famatsiana entana ilaina amin'ny fiainana andavanandro manoloana ny fitokonana ataon'ny mpitatitra fiara lehibe amin'ny lalam-pirenena faharoa" hoy ny talen'ny varotra anatiny, Andry Andriamarimahefa. "Ny faritra atsimo Andrefana afaka mamatsy ny faritra matsiatra Ambony. Ho an'Antananarivo, tsy maintsy misy ny fiaraha-miasa amin'ny mpanafatra entana matanjaka mipetraka eto Antananarivo izay manana ny fitaterany mba tsy hisian'ny fahatapahana famatsiana". Mety hisy fiatraikany ihany amin'ny vidin'entana anefa izany raha lavareny ny fitonkonana hataon'ny mpitatitra fiara lehibe, raha ny fanazavana.
Toky R