Jean-Luce Randriamihoatra

omaly 06 janoary 2024. Ny tenany izay notondroina ho niditra an-tsokosoko tao anatin’ny tranonkalan’ny CENI izay nahitana voka-pifidianana mampandresy ny kandida Tojo Ravalomanana teto Antananarivo, ny andron’ny sabotsy 21 desambra 2024 teo, ampitson’ny nanambaran’ny CENI voka-pifidianana vonjimaika. Nosamborina ny ampitson’io zava-niseho tao amin’ny tranonkalan’ny CENI io moa ny tenany. Tsy finiavana hiaro an’Atoa Jean-Luce Randriamihoatra, fa isan’ny nahafantarana azy ny fikirikarirany na fanaovana « analyse » ireo antontan’isa sy atontam-baovao avoakan’ny CENI, saingy io izy voalaza fa nanao ny « piratage » ny kaontin’ny CENI io. Taorian’ny fisamborana, nilaza ny Antoko TIM tamin’ny alalan’ny Sekrtera Jeneraliny Rina Randriamasinoro ny 28 desambra teo, fa niantso ny PNUD hanao « audit » na fitsirihana hanamarina hoe : tena nisy nanao an’izany ve satria tranonkala nandaniana volabe io, ka tsy tokony terena fotsiny hoe : ianao nanao an’izao, ianao niteny an’izao, dia tenenina hoe : ianao izany no nanao an’iny, fa tsy tokony terena ho Atoa Jean Luce Randriamihoatra no atao sorona. « Ny fandikako azy, dia nisy vokatra 2 tao amin’ny CENI hoe : ny iray mandresy ny kandidam-panjakana, ary ny iray mandresy ny kandidanay », hoy i Rina Randriamasinoro tamin’izany. Notsiahiviny fa tamin’ny fifidianana Filoham-pirenena, tao amin’ny CENI rehefa nisy antsapaka, dia tsy tao ny anaran’i Andry Rajoelina, fa avy eo nampidirina. Efa nisy an’izany satria nafana be ny fanenjehana mikasika ny efa fanariany ny zom-pirenena ary efa neverina ho tsy afaka ny ho kandida, izay vao nasisika ny anarany, ka endrika tahaka izany no nandraisan’ny TIM ny zava-nisy tao amin’ny tranonkalan’ny CENI. Ao anatin’ny toe-draharaha politika mafana no mitranga izao ka karazana hafatra politika hampihorohoroana ny mpanohitra ve fa izay mahasahy mijoro hanohitra ny tsy fanjariana sy ny amboletra politika dia efa any am-ponja ny ilan-tongotra ? Mandeha rahateo ny antso avo famondronan-kery !
Toky R