Zaza Ramandimbiarison

izay mikojakoja kolikoly, hoy ny praiminisitra teo aloha, Zaza Ramandimbiarison. Ny Gen Z, tanora mahatsapa, sahy sy manolotena dia tsy manaiky intsony ny enta-mavesatry ny rafitra misy kolikoly izay efa nandratra ny firenentsika elaela, hoy izy. Ankehitriny, misondrotra ny feo milaza tsia amin’ny kolikoly raiki-tapisaka, tsia amin’ny fiarahan’ny manam-pahefana sy ireo mpandraharaha manokana. Misy porofo mazava fa misy tambazotra voarafitra tsara izay mampiray ny manam-pahefana ambony sasany sy vondrona kely amin’ireo mpandraharaha akaikin’ny fitondràna teo aloha, Andry Rajoelina, ka mametraka rafitra mpifaninana tokana amin’ny tsena am-pahibemaso. Ireo tsena ireo dia omena matetika, amin’ny fomba tsy mazava, tsy mifaninana ara-drariny, amin’ny alalan’ny fomba fanao feno adalàna, fifandirana tombontsoa, sy fankahalàna, izay mandika lalàna momba ny tsena ampahibemaso sy ny fitsipika fototra momba ny mangarahara, ny fitovian-jo ary ny fitantanana tsara. Tsy olana eo anatrehan’ny ara-dalàna ity fa olana lehibe amin’ny fahatokisan’ny olona amin’ny fanjakàna. Ny kalitao ratsy amin’ireo fotodrafitrasa, ny vidiny niakatra tsy ara-drariny ary ny fanilihana ireo mpandraharaha mendrika dia manimba ny toekarena sy ny fitantanana. Ankoatra izany, misy tompon’andraikitra sasany nitombo vola tsy ara-dalàna na «enrichissement illicite» nandika ny lalàna anatiny sy iraisampirenena. Anisan’izany ny fifanarahan’ny firenena mikambana momba ny ady amin’ny kolikoly. Tsy manaiky izany ny Gen Z sy ny vahoaka malagasy. Aoky izay! Mitaky fanavaozana lalina sy tsy azo hivadihana amin’ny rafitra sy ny fitsipika izy ireo, miaraka amin’ny fepetra mazava sy mahomby toy izao: Fametrahana rafitra mahaleotena amin’ny fanadihadiana ara-bola sy ara-pitsarana; fanenjehana tsy misy mpialona ireo mpanao kolikoly na ireo mpandray tombontsoa, na avy amin’ny sehatra tsy miankina na avy amin’ny fanjakana, fakàna ny fananana sy ny vola nangalarina tamin’ny tsena hosoka, fanafoanana tanteraka ny fahazoan-dalana hanao tsena ampahibemaso ho an’ireo voaporofo fa nanao heloka. Ity tolona ity dia tsy tolona fotsiny amin’ny kolikoly fa tolona ho an’ny fahamendrehana, ho an’ny fanjakàna mitovy amin’ny lalàna, ho an’ny rariny ara-toekarena ary indrindra ho an’ny fahatokisana indray eo amin’ny fanjakana, ny vahoaka, ary ny mpiara-miombon’antoka iraisampirenena. Ny Gen Z sy ny vahoaka malagasy dia mangataka hamadika pejy amin’ny tantara feno hosoka sy tsy fanasaziana. Mendrika fanjakàna mangarahara, mitovy amin’ny lalàna i Madagasikara. Tsy misy toerana ho an’ny kolikoly intsony amin’ny hoavintsika. Masina ny Tanindrazana, hoy hatrany ny tenany.
J. Mirija