Sosialy

Natsangana tamim-pomba ofisialy omaly eo anivon’ity kaominina ity ilay antsoina hoe : TAMARA na tanana madio ho an’ny rehetra. Iarahany miasa miaraka amin’ny ONG Gret izany mandritra ny 12 volana ka anisan’ny tanjona ny hahafahana manofana ireo tanora ao anatin’ny kaominina amin’izay resaka asa fanadiovana izay. Na izany aza tsy ho mpiasan’ny kaominina izy ireo fa hahaleo tena tanteraka rehefa vita ny fiofanana. Ny isan-tokantrano kosa no hirotsaka handoa latsak’emboka entina hanakaramana azy ireo aorian’izany mba hadio lalandava ny lalana. Mikasika ny fidiram-bolan’ny kaominina manokana dia fantatra fa fanaovana legalisation, ny certification ary ny fikarakarana ny acte de vente no anisan’ny tena mampidi-bola ny kaominina Ampitatafika indrindra amin’izao. Mahatratra 300 ka hatramin’ny 400% mantsy ny vola azon’ny kaominina amin’izany rehefa nitarina ny ora fandraisana ireo mpikarakara taratasy. Noho ny fiakaran’ny vidim-piainana sy hahafahana manefa ara-dalana ny karaman’ny mpiasa anefa dia fantatra fa nakarina ny saran’ny fikarakarana ny acte de vente raha araka ny fanazavan’ny Ben’ny tanana Rado Ramparaoelina raha tsy nakarina kosa ny saran’ny fikarakarana kopia mari-pahaterahana sy ny bulletin de naissance ho fanamaivanana ny fahasahiranan’ny Ray aman-dReny. Ny mba hanatevenana ny kitapom-bolan’ny kaominina no antony ankoatra ny fanatontosana ilay fampiakarana ny karaman’ny mpiasa 10%. Pati Legende : Rado Ramparaoelina, Ben’ny tananan’Ampitatafika