Isan’ny mampihisatra ny fandrosoana io satria ny olona sy vahoaka vahoaka noana dia tsy tena afa-mamokatra. Manodidina ny 40% eo ny tahan’ny voakasiky ny tsy fanjarian-tsakafo. Nisy fihatsarany anefa io tao anatin’ny 20 taona farany satria niainga 56,4% ny taona 1992 ary 39,8% ny 2021. Voasokajy ho tena ambony be anefa io, raha ny fanamarihan’ny UNICEF na ny Sampan-draharahan’ny Firenena Mikambana misahana ny zaza sy ny reny. Ny antontan’isan’ny UNICEF Madagascar tamin’ny fiandohan’ity volana ity, dia milaza fa mahatratra 874 000 olona ianjadian’ny tsy fanjarian-tsakafo mahery vaika any amin’ny Faritra Atsimon’i Madagasikara amin’izao fotoana izao, araka ny fanadihadiana tafiditra amin’ny fanasokajiana mikasika ny antoka momba ny fanjarian-tsakafo. Ahiana vao mainka hihombo io noho ny fandalovan’ny rivodoza Freddy. Arakan y vinavina, ankizy hatrany amin’ny 115 000 any amin’io faritra io no mila fikarakarana manokana hiadiana amin’ny tsy fanjarian-tsakafo mahery vaika. Noho ny tsy fanjarian-tsakafo eto Madagasikara, mahatratra 37% amin’ny vehivavy 15 hatramin’ny 49 taona no tratry ny “anémie” na tsy fahatomombanana ara-pahasalamana, ary 17% amin’ny zaza vao teraka no tsy ampy lanja. Mahatratra 14,5% amin’ny harin-karena faobe na PIB kosa ilay 3 384 miliara very noho ny fisiany sy ny fiantraikany, raha ny antontan’isan’ny PAM nandritra ny fampahafantarana lehibe na “symposium” mikasika ny fanjarian-tsakafo ny zoma 17 martsa lasa teo. Mba hiatrehana izany, misy ny politika nasionaly vaovao hiadiana amin’ny tsy fanjarian-tsakafo izay heverina hotanterahina ny 2022-2030, ary voalaza fa mametraka ny drafitra marolafy momba ny tsy fanjarian-tsakafo 2022-2026. Nampahafantarina ofisialy nandritra ny hetsika nasionaly momba ny fanjarian-tsakafo ny zoma teo ireo antontan-kevitra roa ireo, ka fanamby ny hiantohana ny zo hisitraka fanjarian-tsakafo araka ny tokony ho izy, fa hampiroboroboana ihany koa ny fahasalamana sy ny fanatsarana ny fiainan’ireo vondron’olona ianjadian’izany.
Tena ny tsy fanjarian-tsakafo ve no mahery vaika sy tsy mety resy sa ny finiavana politika no tsy ampy? Sa lalaovina mihitsy hitadiavana famatsiam-bola? Mbola midadasika I Madagasikara, ary azo hamokarana avokoa ny faritra rehetra. Tantsaha ny 80 hatramin’ny 90% amin’ny mponina. Tena mifandraika amin’izany ve ny politika hitantanana ny firenena? Tena mipaka any ve ny fampandrosoana sy ny fitsinjaram-pahefana sy vola? Omen-danja ve ny politikam-pamokarana sa ny rendrarendra sy mamirapiratra no mahamaika sy hamafazana ny volam-bahoaka ?
Toky R
Mikasa hamita tetikasa famatsian-drano ankehitriny ny fikambanana Mamiratra Antehiroka,
Nampitolagaga ny maro ny fihetsiky ny vehivavy iray tao Toamasina omaly.
Mahamasina Hanomboka anio Alarobia 24 Jolay etsy amin’ny kianjan’i Barea Mahamasina ilay Foara Trano