VIDIM-BARY ENY AN-TSENA

ny vidim-bary eny an-tsena tato anatin'ny herinandro izao. Nanomboka ny herinandro teo no nahitana taratra izany ka anisan'ny voakasika ny vary tsipala. Tsy nisy intsony ilay kapoakam-bary 600 Ar teo aloha. Lasa 650 Ar izy tamin'ny herinandro ary efa nahatratra 700 Ar ny iray kapoaka nanomboka tamin'ny Alatsinainy teo. Mijanona ho 800 Ar foana kosa ny vary gasy. Raha araka ny resaka nifanaovana tamin'ny mpivarotra enta-madinika iray dia avy any am-potony no mahatonga io fiakaran'ny vidin'ny vary tsipala io. Tsy ny vary ihany hoy izy fa maromaro ireo karazana kojakoja ilaina amin'ny fiainana andavanandro no niaka-bidy. Ny mahagaga anefa dia tsy misy elanelam-potoana iray volana akory izany fiakaram-bidy fa herinandro monja fotsiny. Eo an-danin'izay dia nanamafy Atoa Zafimbahiny Talen'ny varotra sy fanjifana eo anivon'ny Ministeran'ny varotra fa fotoana fitobahan'ny vary gasy eny an-tsena izao. Tapitra mamoaka ny tahirim-bokatra hananany avokoa mantsy ireo tantsaha mpamokatra. Manodidina ny 2.800 ka hatramin'ny 3.000 Ar ny vidin'ny iray kilao raha ny nambarany izany hoe : 800 Ar eo ho eo ny iray kapoaka. Ny vary nafarana kosa hoy izy no tena nahitana fiakarany ny vidiny noho ny tsy fahampiany. Manodidina ny 800 Ar miakatra ny vidin'ny iray kapoaka, miankina amin'ny karazany.
Pati
Légende : Efa misy 800 Ar indray ny kapoakambary eny an-tsena amin'izao !