Sport

Tsara lavitra noho ny hita farany kosa anefa ny endri-dalaon’ireo mahery fon’ny firenena niaro ny loko maitso, fotsy, mena. Miainga aloha ny rivo-baovao ary hita ho nanana faharesen-dahatra na hoe «motivé» lavitra noho ireo voaantso farany tamin’ny andron’ny mpanazatra teo aloha, Nicolas Dupuis, ireo voaantso tamin’ity fampivondronana voalohany niaraka tamin’ny mpanazatra vaovao, Romuald Rakotondrabe na Rôrô ity. Tonga hatramin’ireo tsy nantsoina aza ary nidongy mba hiaraka hanao fanazarantena mihitsy ny sasany. Raha ny fanazavan’ny mpanazatra moa dia nohararaotina nojerena ihany ny vaika na «performance» an’ireny «nilatsaka an-tsitrapo» ireny ary niankina tamin’izay no nampijoroana na tsia azy ireo teny an-kianja. Tsy iza ireo fa ry Ibrahim Amada sy Donga ary Carolus Andrea. Ireny moa no vokany ary inoana fa hiha tsara kokoa izany manoloana ny fihaonana farany ao anatin’ity fiadiana tapakila ho any amin’ny CAN 2023 ity izay hihaonana amin’i Angola na dia isika efa raraka aza. Efa ho eo rahateo izany ireo heverina fa andry ao afovoany dia ry Marco Ilaimaharitra sy Rayan Raveloson, izay efa tonga nanotrona ny namany tetsy Mahamasina ny alahady teo, fa isan’ny tena andrandraina ihany koa ireo mpanetsiketsika ny lohalaharana sy fampidiram-baolina toa an-dry Loic Lapoussin sy Arnaud.
J. Mirija