Sport

Ampatsahivina ihany fa raha mbola miady toerana any Israely ny vehivavy dia tafita avy hatrany ny lehilahy amin'ny maha tompondakan'i Afrika azy. Efa vita rahateo ny antsapaka ary fantatra izao ireo izay hiray vondrona amintsika .Tena ireo sangany avy hatrany no hifandonan'i Elly Randriamampionona sy ny namany satria ahitana an'i Frantsa, Alemaina, Serbia ary Brezila. Tena mafy fa tsy mbola manary toky avy hatrany ireto miaramilan'i Deda Randrianarivelo ireto. Hafa mihitsy mantsy ny lalao lalaovin'olona telo sy ny dimy. Tombony dia ny fahazan'izy efa-dahy miaraka. Ankoatr’i Elly mantsy dia efa niaraka taminy hatramin'ny fahakeliny tany Mahajanga i Livio Ratianarivo. Koa satria mila vatana koa ity taranja ity dia nantsoin'i Deda handrafitra ny ekipam-pirenena ihany koa i Arnol Solondrainy sy Fiary Rakotonirina. Raha ny fanomanana indray dia efa nanomboka ny tapaky ny volana febroary teo ary mbola tsy vitan'izay fa noho ny fahazain'ny filoha Mika Ramaroson mandresy lahatra dia mbola mitohy folo andro any Serbia izany kotrana izany. Ny basikety rahateo efa ataon'ny fitondrana laharam-pahamehana toy ny baolina kitra hany ka tsy ho sarotra aminy ny mahita ny ho enti-manana. Samy miandry ny rehetra fa hanoratra tantara vaovao Indray ry Elly ka hanole hafaliana ny Malagasy tsy vaky volo.
Clément RABARY