Rehefa nihazohazo nandritry ny 9 volana

taranja baolina kitra, Rajo Razafindrabe na Berajo, no tonga tany La Reunion rehefa nikatso nandritry ny 9 volana. Tena lava izay fotoana niandrasana izay, hoy ity mpilalao malagasy ity. Tena faly aho, hoy izy, fa tonga ihany ankehitriny. Somary mafimafy ny niainana nandritry ny volana vitsivitsy talohan'ny nahatongavako taty, hoy ihany i Berajo. Tena efa nahatratra iray taona izay no nifandraisana tamin'i Berajo fa navelanay hiteny izay hiteny, hoy kosa ny klioban’ny Saint Denis FC ao La Reunion, izay klioba nifindran’i Berajo. Maro no niheritreritra hoe efa votsotra ny momba an'iny, hoy ny fampitam-baovao avy any an-toerana omaly. Izahay kosa anefa dia tsy nilavo lefona hatrany fa nanohy ny ezaka rehefa mba nahafahany ho tonga taty ankehitriny. Tena navesatra ny fikarakarana ny fivoahan'i Berajo tao Madagasikara. Hisaorana ireo rehetra izay niasa tao ambadika ka mba nahafahan'i Berajo ho tonga teto, hoy hatrany ny filohan’ny Saint Denis FC. Anisan'ny hita tonga naka an'i Berajo teny amin'ny seranam-piaramanidina moa i Tsito Razafindrasata, izay mpilalao malagasy ao amin'ny St Denis FC ihany koa . Nampahafantarina omaly ary fa dia vita ihany izany ny famindrana an’i Berajo hilalao amin’izay ao amin’ity klioba ity rehefa nihazohazo nandritr’izay 9 volana tsy nananany klioba izay.
J. Mirija