Sport

Ny taona 1923 no nijoro ity fileovana ity raha tsiahivina ka mpilalao matihanina miisa 2.084 no efa nandalo teo anivony hatrany am-boalohany ka hatramin'izao taona 2022 izao. Miisa 154 kosa ankehitriny ireo mpilalao mandrafitra ny USAnkadifotsy ahitana ireo mpilalao zandriny,tanora ary ny efa zokinjokiny. Teboka 5 no entina hankalazana izao faha 100 taonany izao hoy ny Filohan'ny fankalazana Rakotomalala Fenohasina. Voalohany dia hisy ny lalao telo sosona hotontosaina amin’ny volana Janoary,Aprily ary hofaranana ny volana septambra 2023,hiarahan-dry zareo USAnkadifotsy amin'ireo fileovana misy eto Analamanga izany rehetra izany toa ny eny Ambondrona,Stade Olympique de l'Emirina,ny mpilalaon'Isotry …. Hisy koa ny hetsika ara-kolotsaina indroa miantoana ka eo ny fampirantiana ny tantaran'ny USAnkadifotsy nandritra izay 100 taona nisiany izay,eo koa ny fampisehoana goavana hotanterahina miaraka amin'ireo mpanakanto maro mpiara-miasa sy mpanohana. Arahin'ny fiaraha-misakafo lehibe iarahan'ireo mpilalaon'ny USA sy ny vahoakan'Ankadifotsy izany ! Fa tsangambato 2 goavana kosa no hanamarika ny fankalazana hoy ny filohany ka tsangambato hapetraka eo amin'ny araben'Ankadifotsy ny iray,arahina fananganana salle de musculation fa ny tena goavana dia ny fanomezana asa ireo mpilalao eo anivon'ny fileovana Ankadifotsy ka ireo Raiamandreny mitarika ny fileovana,ny komitin'ny fankalazana,ny fokontanin'Ankadifotsy ary ireo mpandraharaha mpanohana ny USAnkadifotsy no tompomarika. Ity tetik'asa farany ity moa dia natao mba hampifantoka bebe kokoa ireo mpilalao amin'ireo lalao hotanterahiny sy ny fiainana andavan’androny ka hiandrandrana vokatra tsara avy amin'izy ireo. Marihina moa fa ny fileovana USA Ankadifotsy no ekipan’ny baolina lavalava nandrombaka voalohany ny amboaran'ny Filoha teto Madagasikara tamin'ny taona 1959.
Pati