Actualités

Ny sasany 10 ora. Ny sasany aza moa aman’andro mihitsy, raha ireo fitarainana voaray isan’andro no jerena. Mampijaly ireo mpianatra manao enti-mody ihany koa ankehitriny ity fahatapahan’ny herinaratra lavareny ity. Maro ireo mpampianatra no manome enti-mody amin’ny alalan’ny hafatra miafina anaty tambazotran-tserasera amin’izao andron’ny tekinolojia izao. Efa izay rahateo moa ilay politikam-panabeazana teren-ko masaka ampiharina eto amin’ny firenena na dia mbola iaraha-mahalala aza ny zava-misy. Rehefa tsy vita any am-pianarana ny manome enti-mody ho an’ireo ankizy dia amin’ny alalan’ny MP ao amin’ny Facebook izany no mahita ny tohiny. Tsy voatery hahatakatra finday raitra na fimaso kely, izany hoe, “tablette” avokoa ireo mpianatra ary na manana aza misy amin’ireo fitaovana no hiharan’ny fahasimbana toy ny fitsorahan’ny vatoaratra vokatr’ity delestazy tsy an-kijanona ity. Sady tsy mety hametraka rafitra mifanaraka amin’ny zava-misy eto ve izany ny fitondrana mijoro na eo amin’ny lafiny politika na toekarena na fanabeazana no mbola tsy mahita vahaolana mifanandrify amin’ny olana miseho hatramin’izao ihany koa?
J. Mirija