Fikaonandoha

Niparitaka tanaty tambazotran-tserasera tato anatin'ny herinandro izao tranga nisy nandritry ny fikaonandoham-pirenena ho an'ny tanora natao tany amin'iny faritr'i Matsiatra iny. Vitsy dia vitsy, mba tsy ilazana mihitsy hoe, zara raha nisy ireo tanora tonga namaly ny antso, raha ny fampitan-tsary voaray ny faran'ny herinandro teo. Mbola velankevitra ho an'ny tanora ihany koa, 3 taona lasa izay, mikasika fihariana ho an'ny tanora mihitsy, ary mbola natao tao an-toerana ihany koa, kanefa dia mbola zara raha nisy koa ireo nanatrika izany, raha ny fampitam-baovao voaray hatrany. Heverina, noho izany, fa tsy tongatonga ho azy ity fikaonandoha tsy mahaliana ny tanora ity. Isan'ny fanontaniana mipetraka moa ny hoe ny resaka fampahantarana ve no tsy ampy? Olana ara-panabeazana ve? Sao dia misy sivana na fanavakavahana natao tamin'ireo tanora kosa? Mahagaga nefa, etsy ankilany, fa rehefa fampisehoana mampandihy fitombenana sy ny tahaka izany dia hipoka hatrany ny kianja, hoy ihany ireo fanamarihana.
J. Mirija