Zone Forello-Tanjombato

Orinasa iray ao amin’ny zone Forello-Tanjombato no nomen'ny Minisiteran’ny Tontolo Iainana sy ny Fandrosoana Lovainjafy fampitandremana noho ny setroka mainty maloto avoakany, mandoto rivotra iainana. Nidina nanao fitsirihana teny an-toerana avy hatrany ny Minisitera, niaraka tamin’ny solontenan’ny Kaominina Tanjombato, ny zoma 19 jona 2026, taorian’ny fitarainana voaray momba ny famoahana setroka maloto avy amin’ilay orinasa. Nandritra ny fitsirihana no nahitana tsy fetezana teo amin’ny fiasan’ny chaudière ampiasain’ny orinasa, ary koa ny fisian’ny fako taratasy sy plastika tao an-toerana. Ireo antony ireo no voalaza fa nahatonga ny famoahana setroka mainty izay nandoto ny rivotra manodidina. Neken’ny tompon’andraikitry ny orinasa avokoa ireo lesoka ireo. Nodidiana tsy maintsy manarina ny tsy fahatomombanana rehetra ao anatin’ny 30 andro ilay orinasa mba hampitsaharana ny fandotoana ny rivotra.
Jean D.