Ankadindramamy Basina miaramila mpiambina jeneraly ilay nentina nanafika

Miisa 7 moa ireo no sarona taorian’ny fanafihana mitam-basy nataon'ireo olon-dratsy. Nisy tamin'izy ireo no nanao ny asa fanangonam-baovao mahakasika ilay trano ho tafihina, ny hafa nampindrana Basy hoentina manafika ilay tokantrano, tao no nandray anjara mivantana nanao ny fanafihana ary ny sasany nandray sy nanafina ilay entana halatra tany amin'ny toerana nisy azy, araka ny tatitra efa nataon’ny polisy. Vato sarobidy mitentina hatrany amin’ny 90 milliards fmg moa no voalaza fa nokendrena, raha ny fikaroham-baovao. Raha ny vaovao azo antoka mifandraika amin’ny taratasin’ady 49/CR/J7/22 momba ity raharaha ity, voalaza fa miaramila ny roa tamin’ireo tafiditra tamin’ity raharaha ity, ary samy nidoboka eny Tsiafahy avokoa. Mpiambina manamboninahitra ambony dia ambony amin’ny fibaikoana ny tafika izy ireo. Voalaza fa hoe: nanao iraka tany Toamasina ny iray, kanefa ny basiny no nampiasaina. Tsy tena misy hidiran’ilay manamboninahitra ambony kanefa na izany aza, voalaza fa iniana hafenimpenina ny hoe: mpiambina an’ilay manamboninahitra ambony manana fibaikoana an-tampony eo anivon’ny tafika ireto voasaringotra amin’ny asa ratsy mampivarahontsana. Ny fitsarana no mamaritra na meloka na tsia ireo, fa izany aza, tena efa zava-doza tsy roa aman-tany raha toa ka olona manodidina ny manamboninahitra ambony eo amin’ny tafika izay tokony ho fitaratra no lasa jiolahy mivantana na ankolaka, mampiasa ny basiny hamonoana ny mpiray tanindrazana. Ahiana hiantraika any amin’ny toerana aman’andraikitr’ilay manamboninahitra ambony ve ny nahasaringotra ny mpiambina azy amin’ny asa ratsy ka izay no tsy dia niresahana ny momba azy ireo? Nirarakopana tato ho ato ny fahenoana fa basina mpitandro filaminana no hanafihana sy hitifirana olona etsy sy eroa. Vao ny 14 novambra teo, dia basina polisy no voalaza fa nitifirana olona roa teny Ambohimatsinjo Imerikasinina, ity indray basina miaramila no nanafihana teny Ankadindramamy,...
Toky R