Politique

dia naneho ny governoran’Analamanga Hery Rasoamaromaka omaly momba ny fitantanana firenena hoe: izay tsy manao ny asany esory. Nanaitra ny filazany fa “ ny 4 martsa 2025 aho dia “bye bye politika”,… Azo raisina ho fitsaharana ara-politika io? Governora iray no manao ny tsy mety, ny rehetra no miara-maloto, dia miteny aho hoe: miasà tsara, aza manararaotra, misy olona nametraka teo, misy vina napetraky ny Filoha, hoy ny governoran’Analamanga? “Amin’ny maha sekretera nasionalin’ny antoko ahy, miasà tsara, raha ny olona hafa ve no manana governora 23 tsy handroso isika, ka tokony ho tonga saina, ny Faritra Analamanga manao izay ho vitany,… Fa rehefa misy manao ny tsy mety, tsy ny governora ihany fa na minisitra na tompon’andraikitra ara-panjakana samihafa dia tokony hiala daholo. Ny fitondrana mandalo, miezaka manao asa, mba nisy kely vitako ihany mitaha amin’ny hafa. Tokony mihaino ny mpanohitra ihany koa izahay rehefa miteny”, hoy ity olom-boatendry ity. Raha mikasika ireo governora manokana, betsaka no voatonontonona amina raharaha hafahafa, indrindra fa ny fitantanana volam-panjakana, ny kolikoly,… saingy sady tsy mametra-pialàna ilay voatonotonona no tsy manaisotra azy ny olona nanendry. Ny olom-panjakana ambony hafa ihany koa betsaka ny dosie maloto, fa amin’ny ankapobeny toa mipirina avokoa, mety miandry fitondrana manaraka angamba ?
Toky R