Basy atifi-kavana ny an’ny FAO Tsy hisy firenena mandroso anaty tsy fanjarian-tsakafo

hoy ny Solotenan’ny FAO (Rafitry ny Firenena Mikambana momba ny sakafo sy ny fambolena) eto Madagasikara - Comores - Maurice - Seychelles, Mbuli Charles Boliko, omaly, nandritra ny fanaovan-tsonia fifanaraham-piaraha-miasa eo amin’ny Ministeran'ny Fampiroboroboana ny Indostria sy ny Varotra ary ny Fanjifana sy ny FAO notanterahina tao amin’ny Carlton Anosy. Vonona, hoy izy, ny FAO ny hanohana an’i Madagasikara hanamafy ny fametrahana ireo fenitra iraisam-pirenena ho tombontsoa sy fiarovana ny mpanjifa. Tafiditra indrindra ao anatin’ny fiaraha-miasa ny fanampiana an’i Madagasikara amin’ny fanatsarana ireo fitsipika momba ny fifanakalozana ara-barotra mikasika ny sakafo na eto an-toerana na eo amin’ny tsena ivelany izany. Nanatanteraka ny fanaovan-tsonia, andaniny ny Sekretera Jeneralin’ny ministeran’ny fanjifana, Rakotondramanana Onja Miandry izay nisolo tena ny Minisitra sy ankilany ny Solontenan’ny FAO, Mbuli Charles Boliko. Namafisin’ny Sekretera Jeneralin'ny ministera fa mifanandrify tanteraka amin’ny lalan-tsaina ho fiarovana ny mpanjifa ity fanohanana ataon’ny FAO ity. Ary indrindra koa manome vahana sy lanja bebe kokoa ny famokarana anatiny sy mampirisika ny mpamokatra eto an-toerana amin’ny fifaninanana ara-barotra eo amin’ny tsena.
Nangonin’i Jean D.