Fandriampahalemana

Cyrille Damien François na Toutou Damien no ahafahantaran’ny maro azy. Marihina fa ben’ny tanàna lany tamin’ny anaran’ny IRK ny tenany. Tranga niseho io omaly 14 martsa 2023 io tamin’ny 10 ora maraina izy io. Notaterin’ny fampahalalam-baovao iray moa, fa nisy vehivavy iray izay voalaza fa mpiara-miasa aminy no niaraka niditra taminy tao tamin’io andro io. “Gaga anefa ny mpiandry ny hotely, ora vitsy taorian’izay raha nantsoin’ity vehivavy izay niaraka taminy ity, fa tsy nahatsiaro tena ity lehilahy niaraka taminy”, hoy ny fitantarana. Nezahina nentina teny amin’ny Hopitalin’Ambatondrazaka, saingy tsy tana intsony ny ainy. Raha ny fanamarihana voaray, trano fandraisam-bahiny roa no nidiran’ity olom-boafidy ity satria ny alahady teo dia voalaza fa tao amin’ny M.I ary afak’omaly tao amin’ny M.H. Mbola feno misitery ity raharaha ity, ka andrasana ny tohin’ny fanadihadiana. Voalaza mantsy fa mampiahiahy ihany, raha ny voalazan’ny mpitsabo nanao ny fitsirihana sy ny fizahana ny razana. Fanontaniana hafa mbola mipetraka ny hoe: sao misy ifandraisany ihany koa amin’ny raharaha “kidnapping” izay malaza any Alaotra itony tranga hafahafa itony? Misy mantsy ny sary niarahan’olona maromaro ahitana ity ben’ny tanàna namoy ny ainy ity sy ilay lehilahy iray antsoina hoe: Fano izay ifampitadiavan’ny mpitandro ny filaminana, ka betsaka no mety ho alaim-panahy hieritreritra hoe: sao sanatria mifandrohy amin’izany? Mampametra-panontaniana ireo toe-javatra hafahafa misesisesy any Alaotra hoe: fa inona marina no ao ambadik’ireo raharaha toa sesilany miseho? Tany Alaotra teo amin’ny tantara no nisy governora voatonontonona ho nanao toetra tsy mamoafady tamina tovovavy vahiny, izay nesorina tamin’ny aogositra 2022. Mandeha raharaha fandripahana sy fitondrana voamboana tsy ara-dalàna tany amin’ny oktobra 2022 izay depiote no voalaza fa mpanome fahazoan-dàlana saingy vitavita ho azy tsy misy tohiny, dia mbola tany Alaotra ihany. Mandeha raharaha “kidnapping” izay misy mpiara-miasa amina depiote voarohirohy sy ifampitadiavana saingy mbola tsy hita. Tany amin’ny jona 2022 aza dia vadina depiote iray sy ny fiarany no voalazan’ny lasibatra fa hitany tamin’ny raharaha “kidnapping”. Vao andro vitsy ilay famonoana mpampianatra sy ny zanany sy nitifirana olona 4 voalaza fa tompon’antoka,… Toa tena mikorontana na akorontana ambony ambany mihitsy ity faritra ity sy ny fiarahamonina ao aminy mba ahafahana mandroba sy manao tantely afa-drakotra ao aminy angamba satria tena manan-karena I Alaotra Mangoro?
Toky R