Aferana Cocaïne mitentina 19 miliara Ar

alatsinainy 19 febroary 2024 teo tao amin'ny toeram-pametrahana entan'ny orinasa lehibe iray ao Androranga Toamasina, raha ny fampitam-baovao voaray ny sabotsy teo. Naharay angom-baovao ny Polisy mahakasika ny fivezivezen'ny zava-mahadomelina mahery vaika ao Toamasina sy ny fikasana hanaparitaka izany eto an-drenivohitra sy manerana ny nosy. Araka izany dia nisy ny fisavana natao tamin'ny "entrepôt" na fanatobiana entana iray tao Androranga tamin’io 19 febroary io ka tamin'izany no nahatrarana vovon-javatra miloko fotsy notsinjaraina anaty harona plastika miisa 57. Nosamborina avy hatrany ireo 3 lahy tompon'ilay toerana fitehirizan'entana ary nentina nihazo an'Antananarivo hatao famotorana. Rehefa natao ny "test" na andrana dia fantatra fa Cocaïne avokoa ireo hita tany Toamasina ireo. Nogiazana avy hatrany moa ireo Cocaïne ireo ary nodorana araka ny fahazahoan-dalana avy tamin'ny fampanoavana. Tombanana ho 19.296.000.000 Ariary ny fitambaran'ny tetibidin'ireto Cocaïne ireto. Natolotra ny fampanoavana ny alakamisy 22 febroary ny raharaha ka naiditra am-ponja eny Tsiafahy izy 3 lahy ireto, raha ny fampitam-baovao voaray hatrany.
J. Mirija