Mpanao politika jamban’ny vola

Raha ny fanehoan-kevitra marolafy hatramin’izay, raha ny lafiny fitantanana ny firenena no jerena, dia isan’ny isatra ho an’ny fampandrosoana ny mpanao politika jamban’ny vola, izany hoe, manana fitiavam-bola tafahoatra. Malaza ankehitriny ny resaka fifanarahana ambadika ifanaovan’ny mpanao politika milaza azy ireo ho mpifanandrina na ilay antsoina mahazatra hoe «deal». Sarotra ny tsy hino hoe vola sy tombontsoa manokana no tena fototr’izany. Niharihary tao anatin’ny fitondràna Rajaonarimampianina ny fisian’ny antsoina hoe malety, izay volabe tsy fantam-pihaviana notsinjaraina tamin’ireo depiote teny amin’ny antenimieram-pirenena teny Tsimbazaza teny. Tsy mbola lefy hatramin’izao izany fa isaky ny misy fanapahan-kevitra ho raisina eny anivon’ity lazaina fa lapan’ny demokrasia ity na lalàna goavana ho laniana dia heno hatrany izay voambolana hoe malety izay. Tsy ireo mpanao politika anaty fitondràna ihany moa no ahenoina izay resa-bola izay fa na tamin’ireny fifidianana filoham-pirenena 2023 ireny koa aza dia voalaza fa nisy izay fifanarahana miafina nifanaovan’ireo kandida miisa 11 tamin’ny kandidà lany ho filoham-pirenena ankehitriny, izay efa niely maneran-tany fa kandidà efa tsy malagasy intsony fa niofo ho frantsay. Lojika tokoa ve, raha izay no azo amehezana azy, ny fisiana fifanandrinana politika naharitra 16 taona izany tsotra izao fotsiny nefa ilay firenena ankehitriny efa lasa farany mahantra indrindra eto ambonin’ny tany?
J. Mirija