Mpanolotsaina ambony miisa 4 ny PRRM

Nankatoavin’ny Fitsarana Avo momba ny Lalàmpanorenana (HCC) ny andraikitry ny “kolonely” efatra, izay mpiara-miasa akaiky amin’ny filohan’ny Fiadidian’ny Fanavaozana ny Repoblika na PRRM. Nisy ny fangatahana fanazavana nataon’ny Filoham-panjakana Randrianirina Michael, izay nitondran’ny HCC valiny. Ao anatin’ny didy navoaka omaly 18 novambra 2025, nanamafy ny HCC fa ny Kolonely Lucien Rabearimanana, Médecin Kolonely Manantenasoa Marcellin Zafitasondry Ranoelson, Kolonely Solofoniaina Thierry Rampanarivo, ary ny Lieutenant-Kolonely Gervais Andriamiarisoa dia manana ny anaram-boninahitra hoe Mpanolotsaina ambony ao amin’ny Fanavaozana ny Repoblika. Noho izay toerany izay, manana andraikitra fototra “hanampy ny filoha amin’ny fanatanterahana ny asany”. Na dia tsy manana ny fahefana rehetra araka ny Lalàmpanorenana toy ny Filoham-pirenena aza izy ireo, dia mbola manana laharahana ambony araka ny arofenitra mitovy amin’ny Filoham-pirenena ihany. “Ireo Mpanolotsaina Ambony ireo dia manana zo hahazo tombontsoa sy zo mitovy amin’ny Filoham-pirenena ”, araka ny didin’ny HCC. Navoitra fa ny fahefana miaramila tarihin’i Kolonely Michaël Randrianirina izay natolotry ny HCC taorian’ny fanamafisana ny fahabangana teo amin’ny fitondrana, dia rafitra manana andraikitra hitantana ny firenena mandritra ny fotoana voafetra, “rafitra misy manamboninahitra miaramila dimy izany, ka Kolonely Michaël Randrianirina no filoha ary ny efatra hafa manana ny anaram-boninahitra hoe Mpanolotsaina Ambony”. Taorian’izany, nanambara ny HCC ny hisian’ny didim-panjakana mamaritra ny fikambanana sy ny fiasa ao amin’ny filohan’ny Fanavaozana ny Repoblika Malagasy izay havoakan’ny filoha. Tamin’ny 31 Oktobra, efa nankatoavin’ny Filankevitry ny Minisitra ny didim-panjakana mamaritra ny rafitra sy ny fiasa ao amin’ny Fiadidian’ny Filohan’ny fanavaozana ny Repoblika Malagasy.
Toky R