Olom-boafidy fotsy varavarana

kaominina lavitr’Antananarivo, mety tsy anaty faritra Analamanga akory, nefa dia hita matetika, saika isan’andro mihitsy mivezivezy manao fitadiavana eny Andravoahangy na eny Isoraka na etsy Anosy. Depiote tsy mahita ny distrika nahalany azy raha tsy isam-bolana na isaky ny fety ihany na isan-taona mihitsy. Tranga tsy vao hita androany izany fa saika hita hatrany nandritr’ireo repoblika nifandimby teto amin’ity firenena ity. Ireo kaominina ambanivohitra sy ireo distrika heverina hoe lavitr’andriana no tena tsikaritra fa matetika ahitàna izany. Tranga tsikaritra ho toa tsy nahabe adihevitra loatra hatramin’izay nefa dia heverina fa porofon’ny tsy fahatomombanan’ny fitsinjaràm-pahefàna teto amin’ny firenena ihany koa. Tsy mahavelona ve ny asa maha ben’ny tanàna dia mila mitady fidiram-bola hafa sa fanaovana tsinontsinona vahoaka tsotra izao? Ahafahana mampandroso kaominina ve ny fomba fiasa toy izany? Afaka misolo vava ny vahoaka na mitatitra ny marary ny vahoakany araka ny tokony ho izy ve ny solombavambahoaka tsy ampy fidinana ifotony any amin’ny distrikany akory? Tena fialàn-tsiny azo ekena ve ny resaka faharatsian-dalana? Isan’ny fanontaniana manitikitika izany. Raha ny tarehimarika namaritàn’ny minisiteran’ny atitany azy farany ny taona 2015 moa dia miisa 1693 ny kaominina eto Madagasikara. Mitsinjara anatina distrika miisa 119 ireo ary faritra miisa 23, raha ny fanisàna voaray farany hatrany.
J. Mirija