Politique

ankilany. Nampihetsi-po ny maro ny sarina zazakely taolana mifono hoditra notrotroin-dreniny, ankoatra ny tranga herinandro mahery lasa izay dia ny 27 oktobra nisiana olona 4 torana teo am-piandrasana fizaram-bary. Tahaka ny tontolo roa samihafa mihitsy, fa tsy firenena iray no resaka, raha ampitahaina amin’ny fihetsiky ny Filoha mivady tany Nosy Be nanapoaka champagne, manao fiainana, mandany vola,… raha toa ka efa tena loza mihatra kosa ny any Ikongo. Marina fa mety tsy ho vita ao anatin’ny fotoana fohy ny fanarenana sy famahana ny olan’ny firenena ary tsy finiavana hisintona lakolosy, saingy indrindray toa lasa miteraka heso ho an’ny andaniny ny fihetsika ataon’ny ankilany. Zo fenon’ny Filoha mivady ny mitokana zava-bita, manao fety aman-danonana, maneho fa miasa,… saingy tsara ny manamarika fa tsy antoko na fokontany iray no tantaniny, fa firenena manontolo,… ka izy no iandronan’ny rihitra vao misy zavatra tsy mety. Izy no iantefan’ny fanakianana voalohany eo anatrehan’ny tsy fivahanan’ny olana samihafa etsy sy eroa. Ity Fanjakana ity rahateo no isan’ny nitaiza ny olona hidoka lava ny Filoha. Voadingana ny rafitra sy antanan-tohatra rehetra fa ny Filoha no mila deraina sy omem-boninahitra lava, ka dia izy izany no tokony hijery mivantana sy hamaha itony olana goavana momba ny maha olona any Ikongo itony, rehefa tsy hizara asa sy fahefana hanafainganana izany ny tenany. Matetika mampiady hevitra na miteraka “polémique” ny fihetsika sy zavatra ataon’ny Filoham-pirenena, ka asa na mba tsapan’ny mpitondra ihany izany na tsia. Misy ny vina mety tsy voadinika sy tsy voalanjalanja, ao ny fitondran-tena sy kabary indraindray mihantsy sy mampisara-bazana,… Isan’ny adidiny voalohany, ary voarakitry ny lalàmpanorenana anefa ny fiantohana ny firaisam-pirenena.
Toky R