Taorian’ireo lalao miisa 2 tsy nahazoany fandresena nifanandrinana tamin’i Guinée-Bissau, dia mbola very toerana miisa 4 indray ny ekipam-pirenena malagasin'ny baolina kitra na Barean'i Madagasikara eo amin’ny filaharana FIFA, raha ny fampitàm-baovao voaray omaly. Raha faha105 izany teo dia lasa faha-109. Manana lalao miisa 2 moa sisa ny Barea ao anatin'izao fiadiana ny tapakila hankanesana any amin'ny amboaran'i Afrika na CAN 2027 izao. Lalao izay tsy hahafahana mahazo izany tapakila izany intsony anefa ireo fa dia ny fanatsaràna ny laharana eo anivon'ny Federasionina iraisampirenen'ny baolina kitra na FIFA izay izany sisa azo tsinjovina ao anatin'izany rehetra izany. Efa samy miaiky nefa ankehitriny ny maro an'isa, indrindra, ireo mpanohana ny ekipam-pirenena, fa samy tsy mbola nahomby ary paozin'ny tsy hahomby intsony mihitsy ny fitantanana ny baolina kitra malagasy amin'izao fotoana izao, manomboka any amin'ny filohan'ny federasionina hatrany amin'ny mpanazatra ny ekipam-pirenena ankehitriny, Corentin Martins, izay karamaina 18.000 Euro be izao. Ahiana mafy araka izany fa mbola hitotongana io laharana io raha tsy misy fepetra raisina aingana, indrindra, fahatsapan-tenan'ireo efa hitan'ny maro fa tsy mahomby nefa mbola tsy mametra-pialàna hatramin'izao.
J. Mirija