Taranja Basket Ball

Nodimandry i Herilanto Randriamanalina, fantatry ny rehetra tamin’ny fiantsoana hoe Bomba. Mpanazatra ny ASCUT na “Association sportive et culturelle de la commune urbaine de Toamasina” moa no nahafantarana azy farany nialoha izao fodiamandriny izao. Maro ireo klioba nilalaovan’i Bomba tanatin’ny fahatanorany toy ny tao Antsirabe sy Mahajanga. Efa nisalotra ny fanamian’ny Mad Consult sy Sebam ary io ASCUT izay noraisiny an-tanana amin’ny maha mpanazatra taty aoriana io. Efa nanazatra ny ekipam-pirenena malagasy, sokajy zokiny lehilahy (Séniors hommes), nandritry ny lalaon’ny nosy 2015 tao La Réunion ary avy eo dia nitondra ny ekipam-pirenena latsaky ny 16 taona na U16 nandritry ny Afrobasket ny taona 2017. Efa nandrafitra ny klioban’i BBCM Analamanga, sokajy zokiny na “vétéran”, koa izy saingy na dia iny nampidirina haingana omaly tetsy amin’ny CHU-JRA Ampefiloha iny aza moa omaly ny lehilahy dia tsy nahatana ny ainy intsony izany. Mirary fiononana feno ho an’ireo mpankafy ity taranja ity hatrany sy ireo akaiky an’i Bomba ary ny fianakaviany manontolo moa ny gazety Tia tanindrazana.
J. Mirija