Actualités

Augustin Rasoloarisoa nanazava ny savorovoro misy mikasika ny fitrandrahana fasika ataon’ny sinoa ao amin’ny fokontany iray antsoina hoe Ankadivoribe Faravohitra amin’izao fotoana izao. Efa tamin’ny 1 oktobra anefa no nampahafantarina tamin’ny vahoaka ny fisian’ireo mpitrandraka ireo ary nanaiky avy hatrany ireo vahoaka. 2 volana latsaka kely taoriana anefa dia niainga io hetsik’izy ireo izay mitohy ankehitriny io. Novoizina fa misy volamena, fasimainty, safira ao. 3 andro taorian’izay dia nampahafantarina tamin’ny vahoaka nanoloana ny haino aman-jery fa tsy misy afa-tsy fasika irery ao. Mbola tsy nijanona hatrany anefa izy ireo fa nitaky ny fialan’ireo mpitrandraka sinoa. Nomarihin’ity ben’ny tanana ity moa fa efa nandalo tany an-toerana ny solontenam-panjakana toy ny an’ny lehiben’ny distrika, ny minisiteran’ny fambolena, ny solontenan’ny solombavambahoaka izay nanambara fa tsy manimba ny tontolo iainam-bahoaka ny fakana fasika eo. Tsy mikasika ny tanin’ireo mponina ihany koa, hoy hatrany izy, ny fitrandrahana ary ny ankamaroan’ireo miasa ao amin’ny toeram-pitrandrahana aza dia mponina avy ao an-toerana ihany. Manara-maso izany in-droa isan-kerinandro fara faha keliny , hoy izy, ny kaominina ary ireo olona miisa 5 izay voatazon’ny fitsarana kosa dia voalaza fa nanimba fananan’olona.

J. Mirija