Actualités

Anisan'ireo faritra miisa 8 nahazo fampitandremana noho ny rotsak'orana matevina rahateo ny Faritra Boeny, ka io lasibatra io i Mahajanga satria toerana maro dibo-drano. Anisan'ny tena voa mafy ny fokontany Tsararano, Ambalavola, Fiofio ho an'ny omaly. Hatramin'ny omaly tolakandro, nahatratra 657 ny olona traboina nafindra toerana tao amin'ny EPP Fiofio. Tao amin'ny tranon'ny fokontany Ambalavola izy ireo no noraisina voalohany saingy dibo-drano tao noho ny orana nikija tsy niato ka izao nafindra izao. Misy kosa ireo olona amin'ny fokontany hafa izay tsy mbola nifindra noho ny tahotra amin'ny mety ho fandrobana ny fananany. Niara-nisalahy tamin'ny famonjena sy fandraisana an-tanana ireo tra-boina ny BNGRC sy ny Rantsa-mangaikan'ny Minisiteran'ny mponina. Niezaka nanala fako banentsina ny "clapet" eo amin'ny tetezan'i Fitim ny ekipan'ny kaominina ambonivihitr'i Mahajanga miaraka amin'ny mpitandro filaminana, izay heverina ihany amin'ny lafiny iray fa zavatra efa tokony ho natao nialoha. Ankoatra izay, tapaka ihany koa ny RN4 miazo an'i Mahajanga omaly noho ny ranobe teo Antanambao Ambovondramanesy.
FARITRA 8 NAHAZO FAMPITANDREMANA
Faritra miisa 8 no nahazo filazana fampitandremana satria ho betsaka hatrany ny rotsak'orana amin'ny faritra avaratra andrefana sy atsimo atsinanan'ny Nosy ary ny faritra sasany amin'ny afovoan-tany, araka ny fampahafantarana navoakan'ny Foibe famantarana ny toetr'andro. Hahatratra 70 hatramin'ny 100mm/24ora izany rotsakorana izany; ary tombanana haharitra hatramin'ny rahampitso 24 janoary. Miteraka fiakaran'ny renirano, fanelingelenana amin'ny fahitana, rano miandrona sy ranotrambo ary fihotsahan'ny tany io habetsaky ny rotsakorana io. Mihatra, araka izany, ny filazana fampitandremana momba ny fahabetsahan'ny rotsakorana, ho an'ny distrikan'Ambanja, Bealanana, Analalava, Antsohihy, Boriziny, Mampikony, Besalampy, Mahanoro, Marolambo sy ny distrika rehetra ao amin'ny faritra Boeny, Vatovavy, Fitovinany ary Analamanga.
Toky R