Actualités

 Manomboka amin’ny 06 ora maraina dia efa tapaka ny jiro isan’andro. Tapaka indray ora roa aorian’iny dia tahaka izay hatrany fa tsy mijanona. Ny amin’ny alina no tena mahakivy ny mponina raha araka ny fitarainana voaray hatrany. Mahatratra hatrany amin’ny adin’ny 06 mantsy izany fahatapahana izany, antony mampirongatra ny tsy fandriampahalemana. Betsaka arabe misampantsampana nefa eny Fenoarivo saingy vokatr’izay delestazy izay dia maizin-kitroka ny tanana. Afaka manao izay tiany hatao tsara araka izany ireo jiolahy ka anisan’ireny ny fanendahana ireo andrin-jiro vy mandeha amin’ny herin’ny masoandro izay tsy misy mirehitra intsony. Tsy lazaina intsony ny hala-botry…. Manao antso avo amin’ny JIRAMA araka izany ny mponin’i Fenoarivo. Tsy misy mahara-baovao intsony ihany koa mantsy izy ireo vokatr’izay delestazy izay. Ny tsenan’ny labozia sy ny vato aratra no tena mandehabe, fandaniana hafa mivoaka any am-paosin’ny isan-tokantrano nefa tsy maintsy aloha ihany koa ny faktioran’ny JIRAMA isam-bolana izay tsy mihena mihitsy fa vao mainka midangana aza.
Pati