Actualités

Faritra Melaky hatramin’ny omaly hariva fotoana nanoratanay no nisy ny foibeny dia mbola ho avy ihany koa ny manaraka izay vinavinaina ho roa aloha hatreto raha araka ny vaovao nampitain’ny sampana mpamantatra ny toetr’andro. Maro ireo fihetsika sy fomba tokony hatao hiatrehan’ny olom-pirenena ny rivo-doza araka izany hisorohana ny loza mety hitranga. Raha araka ny resaka nifanaovana tamina teknisiana iray dia tokony hamafisina ny tafontrano ho an’ireo tsy mampiasa tsindrin-tafo noho ny herin’ny rivotra. Fasika amin’ny gony dia efa mety izany. Tokony hosokafana ihany koa ny tata-drano ho an’ireo mipetraka amin’ny faritra iva mba tsy hiangonan’ny rano ka mety hampianjera ny trano na koa hahatondraka ny rano ao an-tanana. Ho an’ireo monina amin’ny faritra avo ahiana hisy fihotsahan’ny tany dia tokony hifindra trano haingana izy ireny na koa hipetraka any amin’ny fianakaviany aloha mandritra ny fotoam-pahavaratra hisorohana ny loza mety hitranga. Tokony hanangona vatsy ihany koa ny isan-tokantrano toy ny vary sy ny saribao mba tsy hivoahana ny trano rehefa tena avibe ny orana. Tokony hihaino tsy tapaka ny vaovao ny olom-pirenena rehetra rehefa fotoanan’ny rivo-doza hahafantarana ny tokony hatao. Ho an’ireo olona manan-kilema sy efa zokinjokiny dia tsara hatrany ny miaro azy ireny tsy hivoaka ny trano rehefa tena mikija ny orana ho fiarovana ny ainy. Toraka izany koa ny ankizy madinika manoloana ny mety ho fiakaran’ny rano.
Nangonin’i Pati
Legende : Tsara hamafisina tahaka izao ny tafontrano rehefa vanim-potoanan’ny rivo-doza