Actualités

 Manomboka mampametra-panontaniana amin’izao fotoana izao hoe: inona tokoa moa izany no tena ilàna io Ministera io? Raha ny seraseran’ny Fanjakana amin’ny ankampobeny dia manana ny Talen’ny seraserany manokana ny fiadidian’ny Repoblika. Manana ny azy ny departemantam-panjakana isan-tsokajiny. Toa zary lasa rafitra natao hifehezana ny asa fanaovan-gazety ny Ministeran’ny serasera. Raha tarafina amin’ny zava-niseho tato anatin’ny herintaona, zary natao ho famoretana sy fanaovana antsojay amin’ny orinasan-tserasera sy ny mpanao gazety. Tao anatin’ny fihibohana dia ireny niaraha-nahita ireny ny fifehezana ny haino aman-jery tao anatin’ny “Réquisition d’office”. Izay orinasan-tserasera mety tsy afaka nandefa ny fandaharana avy amin’ny Fanjakana dia tratry ny fandrahonana na “lettre de mise en demeure” norahonana hosaziana sy hakatona ary isan’izany ny orinasan-tserasera iray vondrona amin’ny Tia Tanindrazana. Moa ve mba marika fifanajana nataon’io Minisitra io sy ny departemanta iantsorohany taorian’ny fahataperan’ny hamehana dia samy vita eny fotsiny. Hitan’ny Ministera ny varavaran’ny haino aman-jery sokajiany ho mpanohitra rehefa handrahona sy handrangaranga sazy fa toy ny misy maloto ny tokanana rehefa amina zavatra, indrindra moa fa tombotsoa iraisana. Na ireny lalàna momba ny serasera nitetezana orinasa fanaovan-gazety aza nasiana fanavankavahana ny orinasan-gazety notsidihina. Nisy ny antsojay tamin’ny endriny samihafa nahazo ny mpanao gazety na avy amin’ny orinasan-tserasera sokajiana ho mpanohana Fanjakana io na ny avy amin’ireo tondroina ho mpanohitra fa moa mba nijoro sy niaro ny Ministera? Ny OJM hatrany no nijoro sy nanetsika ny mpanao gazety nentina nanehoana firaisan-kiana fa hatreto izany Ministeran’ny serasera izany dia sanatriavin’ny vava natao ho rafitra hifehezana sy hampiasana ny tontolon’ny asa fanaovan-gazety amin’ny kajikajy politika. Zary lasa misalovana sy misisika amin’ny raharahan-tokantranon’ny mpanao gazety, hany ka zary asa miteraka savorovoro sy fisaraham-bazana. Mbola adihevitra hafa sy tena azo lazaina ho sadasada ny nanapahana ny haino aman-jery tsy miankina iray haneha amin’ny « bouquet canal satellite » tsy ho hitan’ny any amin’ny faritra. Nolazaina fa nandika lalàna ka lojika ve hoe : fanapahana tsy ho hitan’ny any amin’ny faritra no vahaolana sazy fa ny eto an-drenivohitra tsy olana ?
Toky R