Actualités

Nanatrika izany teny an-toerana ny Filohan’ny Repoblika Andry Rajoelina sady Filohan’ny Filan-kevitra Ambonin’ ny Mpitsara. Anisan'ny andraikitry ny Fitsarana an-tampony ny miantoka ny firindran'ireo Fitsarana telo lehibe mandrafitra azy dia ny Fitsarana fandravana, ny Filan-kevim-panjakana ary ny Fitsarana misahana ny kaontim-bolam-panjakana. Adidy lehibe hiantsorohan'ny Fitsarana Tampony ny fametrahana ny tany tan-dalàna eto amin'ny Firenena. Izy ihany koa no mandray ny fianianan'ireo mpitsara lehiben'ny Fitsarana Ambony sy ireo manana andraikitra ambony eto amin'ny firenena toy ny Governoran'ny Banky Foibe, ny Tale Jeneralin’ny Bianco, ny Tale Jeneralin’ny SAMIFIN, ny Tale Jeneralin’ny ARAI, sns. Anjaran'ny Fitsarana an-tampony ihany koa ny manao fitsirihana sy manara-maso ny asan'ireo Mpitsara isaky ny ambaratonga voalohany sy ny Fitsarana Ambony rehetra voasoratra ao anatin’ny lalàna fehizoro. Izany anefa dia tsy manohintohina velively ny fahaleovantenan'ny Mpitsara mpamoaka didy. "Ny irariana dia ny mba hananan'ny Fitsarana endrika vaovao ho tena Fitsarana fanoitry ny fampandrosoana, ka tsy hisy intsony ny tsy fitokisan'ny vahoaka ny Fitsarana fa dia hangarahara ny raharaham-pitsarana anatin’ny fahendrena sy ny fahaizana mandanjalanja amin'ny fahafantarana mialoha ny vokatra sy ny fiantraikan'izany asam-pitsarana izany eo amin'ny fiarahamonina" hoy Atoa. Rakotonavalona Ranary.
Nangonin’i Pati