Actualités

Nonina tany Ambalavao izy sy ireo Ray aman-dReniny no nipoaka iny tolom-panafana tamin’ny 1947 iny. Teraka ny zandriny faha-4 ny Renin-dRamatoa Zénaide Le Chat no nitranga izany raha ny fitantarany saingy tany am-piangonana izy ireo no natory nandritra ny 30 andro teo ho eo.
TENA HOROHORON-TSAINA
Horohoron-tsaina no niainanay tamin’izany hoy Mamazena. Anisan’ny nangotraka ihany koa mantsy raha ny fanazavany ny tolom-panafahana tamin’ny taona 1947 tao Ambalavao tao. Nampitahorin’ireo vazaha tsy nahazo niditra ho mpikambana tao amin’ny MDRM avokoa ny mponina rehetra raha araka ny fanazavany amin’izay tsy afaka ny hikomy sy hanohitra azy ireo. Tany am-piangonana izy ireo no natory nandritra ny 30 andro teo ho eo raha ny fanazavany hatrany nefa vao teraka ny zandriny faha-efatra ny Reniny tamin’izany. Na izany hoy izy dia nandeha tsara ihany ny fampianarana. Mpianatry ry Masera izy tamin’izany fotoana. Ry mompera no niaro azy ireo isan-kalina tamin’izany ka feom-basy sy tafondro nipoapoaka sisa no hany reny nanodidina azy. Tao am-piangonana ihany koa izy ireo no nahandro sakafo sy nihinana izay efa nahatratra an-jatony ka zaza amam-behivavy avokoa ny ankamaroany hoy hatrany ny fanazavany.
NOVONOINA DIA NAHANTONA TENY AMBONY SARETY
Dokotera iray mpitarika ny MDRM raha araka ny fanazavany no novonoin’ireo vazaha sy naantony teny ambony sarety ary nentiny nandehandeha eran’ny tanana nampitahorana ny olona. Natahotra mafy vokatr’izany ny rehetra ka tsy nisy sahy niditra ho mpikambana tao amin’ny MDRM hoy hatrany Mamazena. Nogadraina nandritra izany ihany koa ny dadatoany izay tsy nivoaka mihitsy raha tsy fotoana maharitra. Notsiahiviny moa fa anisan’ny tena nafana fo tamin’ny tolom-panafahana 1947 ny tao Ambalavao saingy na izany aza ny taona 1960 isika vao nahazo ny fahaleovantena izay nambarany fa mbola somary kisarintsariny ihany.

NIFONA
Rehefa nandeha teny ny fotoana dia lany ho Ben’ ny tananan’Ambalavao Ramatoa Ramampy Zénaide Le Chat teo amin’ny fahatanorany rehefa nandalo dingana marobe. Diso fantatry ny olona loatra anefa hoy izy fa nanambady vazaha aho ary vazaha taratasy ihany koa. Nisy araka izany nandritra ny hetsika izay notanterahiny tao Ambalavao ny fifonana tamin’ny fianakavian’ireo olona lasibatra nandritra ny tolom-panafahana tamin’ny taona 1947. Betsaka tamin’ireo olona tany an-toerana mantsy no nanana ireo nogadraina sy novonoina ho faty ka nankahala vazaha tanteraka. Tsy maintsy nitondra ny fifonana aho hoy Mamazena nandritra ny fandraisam-pitenenana nataoko tao anatin’ny lanonam-panjakana iray. Nomarihiny moa fa rariny raha hankalazaina sy marihina manokana ny tsingerin-taonan’ny tolom-panafahana tamin’ny taona 1947 hahatsiarovana ireo lasibatra sy ireo namoy ny ainy tamin’izany fotoana.
Pati