Tena nihena be ny vokatra lodisia

Nanokatra ofisialy izany tany amin’ny Faritra Atsinanana ny Minisiteran’ny indostria sy ny varotra. Raha ny tatitra omaly, mizara roa ny taratasy fahazoan-dàlana na ny « agrément » ka misy ny an’ireo mpanondrana izay nahafeno ny lafiny teknika sy pitsopitsony ilaina amin’ny fikarakana mialohan’ny fanondranana nahafahana nahazo ny « agrément station ». Eo amin’ny 28 ireo mpandraharaha nahazo an’izay teo anivon’ny GEL (Groupement des Exportateurs de Litchis). Eo ihany koa anefa ny fahazoan-dalana ho an’ireo mpanangom-bokatra omen’ny Faritra, ka manodidina ny 900 eo izany tamin’ity. Nohamafisin’ny teo anivon’ny Minisiteran’ny indostria sy ny varotra, fa tena nahitana fihenana tamin’ity taona ity mitaha tamin’ny taon-daza izay nahatratra 1200. Tena kely sy tsy dia misy ny lodisia any ifotony raha ny hita nandritra ny andro voalohany tamin’ny fanokafana, raha ny tatitra sy fanazavana. « Kely dia kely ny vokatra noho ny antony maro : fiovaovan’ny toetr’andro, fahanterahan’ireo fitotra lodisia, fa indrindra ny tsy fahampian’ny orana, araka ny fanamarihan’ny eo anivon’ny CTHT izay mpanara-maso ny fivoaran’ny vokatra lodisia », hoy Atoa Isidore Razanakoto Tale Jeneralin’ny Varotra omaly. Tamin’ny taon-dasa, nanondrana 18 000 taonina teo isika fa amin’ity raha ny resaka nifanaovana tamin’ireo sehatra teknika manara-maso ny vokatra, dia mety mihena hatrany amin’ny 50% ny vokatra amin’ity taona ity, izany hoe : hita amin’izany ihany koa ny mety ho fihenan’ny fanondranana, hoy hatrany ny Tale Jeneralin’ny Varotra. Mazava ho azy, fa hisy fidinany ny vola vahiny miditra na ny « devises » entin’ny fanondranana lodisia avy eto Madagasikara amin’ity taona ity. Isan’ny fanatsarana an’ity sehatra ity moa ny fandrisihana sy tan-tsoroka amin’ny fanavaozana ireo fototra lodisia izay efa maro no antitra.
Toky R