Toetr’andro mandritra ny herinandro Ho betsaka ny rotsak’orana amin’ny faritra maro…

Tsara moa no manamarika fa tao anatin’ny andro maromaro, nitondra oram-be tany amin’ny tapany Atsimon’I Mozambika sy ny Atsinanan’I Zimbabwe I Freddy.Tombanana hivoaka tsy ho el any ranomasin’I Mozambika, saingy mety hitondra oram-be ho an’ny faritra sasany eto Madagasikara. Ny fisian’ny sisan-drahona miaraka amin’ity andro ratsy Freddy ity ao amin’ny Lakandranon’i Mozambika no hamaritra ny toetry ny andro hanomboka anio alarobia, raha ny tombana navoakan’ny Foibe Mpamantatra ny toetr’andro omaly. Tsy misy ahiana anefa ny mety hitombohan’i Freddy hery. Na izany aza, araka ny vina momba ny toetr’andro ho an’ny herinandro manomboka omaly 28 febroary hatramin’ny 5 martsa, dia mety hiteraka rotsak’orana betsaka amin’ny faritra sasany izy manomboka ny alakamisy izao, ka mila arahi-maso, hoy ny mpamantatra ny toetr’andro. Mifandray amin’ny sisan-drahona entin’i Freddy mantsy dia hiverina indray ny oram- baratra saika manerana ny nosy. Araka izany, hiverina indray ny oram-pahavaratra saika manerana ny nosy manomboka ny anio na rahampitso alakamisy. Tombanana ho betsaka kokoa ny rotsak’orana any amin’ny faritra avaratra andrefana, andrefana ary atsimo andrefan’i Madagasikara, raha ny tombana nataon’ny Foibe mpamantatra ny mety ho toetry ny andro hatrany. Hisy fidinana kely ny maripana ambony amin'ny faritra maro eto Madagasikara, ka manodidina ny 13 - 26°C ny maripana ny maraina ary eo anelanelan’ny 24 - 35°C ny tolakandro. Entanina hiomana sy hitandrina hatrany ny rehetra eo anatrehan’ny mety ho fiakaran’ny rano ateraky ny rotsak’orana matevina mety hiseho. Ho an’ny teto Antananarivo Renivohitra, efa niverina nirotsaka ny orana omaly alina, na tsy dia natevina sy tsy naharitra loatra aza.
Toky R