Actualités

Nakarina taty Antananarivo hanohizana ny fanadihadiana azy, saingy izao namoy ny ainy tampoka izao. Nisy ny fanambarana nataon’ny zandary notarihin’ny Talen’ny Filaminana sy ny fanomezam-baovao Jeneraly Ravoavy Zafisambatra omaly, izay naneho fa taorian’ny fahataperan’ny fe-potoana nahafahana nitazona azy, dia nalefa tany amin’ny fianakaviany ary narahi-maso. Mbola nantsoina indray mandeha izy, natao fanadihadiana, olona salama tsara afaka miatrika famotorana no hita, kanefa maty tampoka. « Izaho teo akaikiny foana, tsy nisy olana ary teo akaikiny foana aho hatramin’ny nisian’io olana io. Tonga avy any Ambalavao izahay, nijanona teo amin’ny vavahadin’ny Toby Ratsimandrava, dia hoe handeha hisakafo. Nilaza i Nantenaina fa misy olona fantany tao ka nitarika hoe: andao hisakafo ao, olona 4 niaraka tamin’ireo zandary nitondra azy. Rehefa avy nisakafo, ka handeha famotorana satria niantso ny kapiteny mpanao famotorana no nitambotsotra tampoka, nisy ra nivoaka ny vavany,…”, hoy ny fitantaran’ilay tovolahy fianakaviany. Olona tsy taizan’aretina ary salama tsara anefa i Nantenaina niala ny trano handeha hohadihadiana, raha ny fanamarihana. Nanipika kosa ny zandarimariam-pirenena fa tsy misy sanatria hoe fihetsika na herisetra avy amin’ny zandary mpanao famotorana no nahafaty azy. Eo anatrehan’ny fanontaniana amin’ny mety ho fisian’ny olona niray petsapetsa taminy mety nahatonga izao fahafatesana izao, dia mitohy ny fanadihadiana, ary raha ilaina aza dia azo atao tsara ny mamantatra ny antonanton’izao fahafatesana izao, hoy ny fanambarana. Omaly moa no voalaza fa natao fizahana na « autopsie » ny razana. Nanamafy ihany koa ny zandary, fa ao anatin’ny fanadihadiana tanteraka amin’ny hoe: nanaovany zandary sandoka, ka ny olona mety ho voakasikasik’izany sy tao ambadika tamin’ny asa sandoka maha zandary, dia azo atao hatrany ny mamotopotra azy ireo.
MATY NIALOHAN’NY SAIKA HITONDRANY FANAZAVANA
Tetsy ankilany, mbola namoaka tao amin’ny tambazotran-tserasera tao anatin’ny Vondrona Ny hatagny Ambalavao Tsienimparihy i Nantenaina Rakoto nialohan’ny nahafatesany nilaza hoe : « Akory aby, hivoaka tsy ho ela eto amin’ny Facebook ny publication mahakasika an’iny publication tsy marina mahakasika Nantenaina iny afaka fotoana fohy fa tena afa-baraka fotsiny ny tena. Miandry confirmation avy amin’ny lehibe izay vao mivoaka. Miandrasa kely Tompoko ». Maty nialohan’ny famoahana izany anefa izy, izay toa mampitoetra ny ahiahy fa mety novonoina ankolaka teo anatrehan’ny saika hitondrany fanazavana ? Nanana basy, nanana fanamiana samihafa,… izy ka mety avy aiza ny loharanon’izany ? Mety ho antony nifofoana ny ainy ve mba ny tsy hivoahan’ny tsiambaratelo momba an’ireny ?
Toky R