Fikaonandoham-pirenena

Tontosa ny sabotsy teo ny fotoam-pivavahana fankalazàna an'Andriamanitra noho ny fandraisan-tanana ny Prezidà Synodaly eo anivon'ny Fiangonan'i Jesoa Kristy eto Madagasikara na FJKM ho an'ny Synodam-paritany Toamasina vavahadin'ny filazàntsara. Noraisin-tanana tamin'io fotoana io, araka izany, ny Prezidà Synodaly, Mamy Barinarivo Rajosoa, Mpitandrina, 4 mianaka. Ny Soratra masina ao amin'ny Baiboly Kristianina voasoratra ao amin'ny Hebreo 13: 18 manao hoe "Mivavaha ho anay fa matoky izahay fa manana fiheritreretana tsara ka te hitondra tena tsara amin'ny zavatra rehetra!" moa teny nofidiany sy ny ankohonany ho filamatra manoloana izao adidy masina napetraky ny FJKM aminy izao. Izy ihany koa, araka ny nampahatsiahin'ireo solontenam-panjakàna sy ny solontenan'ny FFKM na ny Fiombonan'ny fiangonana Kristianina eto Madagasikara tonga nanontrona izao fotoana izao no nifanarahana hitarika ny fikaonadoham-pirenena tarihin'ny FFKM ao amin'ny faritanin'i Toamasina. Mivavaha ho anay, araka izany, hoy ny Mpitandrina Barinarivo Rajosoa, fa tsy mora ny adidy napetraky ny fiangonana sy ny firenena aminay.
J. Mirija