Fitondrana banky ropitra

araka ny fanovana katsahin'ny Fanjakana ao anatin'ny volavolan-dalàna mifehy ny tetibolam-panjakana na LFI 2025. Endrika maneho fa tsy manam-bola ny Fanjakana ka miroso amin'ny ampihimamba sy manao izay fomba rehetra hangejana izay sehatra rehetra mety hahazoana vola. Raha fanapariaham-pahefana sy vola na "décentralisation" no tokony hatao dia "centralisation" no misy. Tranga efa nisy teto ny nakana sy nangejan'ny Fanjakana ny tamberiny avy amin'ny Orinasa Ambatovy anjaran'ireo kaominina 25 manodidina, nentina tamin'ny hoe tsy maintsy ampandalovina ny Fanjakana Foibe ny tetikasa hampiasana azy, dia io indray fa ny hetran-trano mba loharanom-bolan'ny kaominina no hotangosana. Efa tsy tonga any amin'ny kaominina ny vola fa atao ampihimamba aty amin'ny Fanjakana Foibe ary lanilaniana fahatany amin'ny kirendrarendra sy zavatra tsy tena mamaly ny filam-bahoaka toy ny teleferika 152 tapitrisa dolara sy Kianja 77 tapitrisa dolara dia mbola tsihifina indray ny kely eny anivon'ny vondrom-bahoaka intsinjaram-pahefana. Raha hiverenana, 30 tapitrisa Ar isan-taona ny fanohanana ara-bola ho an'ny kaominina ka eo amin'ny 80 miliara Ar eo izany ho an'ny kaominina 1695 manerana ny nosy. Mety ampahadimin'ny tetibolana minisitera iray raha atao ny salan'isa. Fampandrosoana inona no vitan'izany? Dia io fa ny mbola kely mba fidiram-bola ho an'ny kaominina atao ampihimamba raha tanteraka sy eken'ireo andrim-panjakana io. Midika ho fihemorana goavana ara-pitantanana io satria raha ny tokony ho izy dia miainga eny ifotony aza no tokony hanatosahana ny volam-panjakana hoenti-manatanteraka ny fampandrosoana, saingy ny mifamadika amin’izay izany no hitranga raha jerena amin’io, ka ny Fanjakana Foibe no handidy sy hanapaka amin’ny hetran-trano. Mandeha izany ny fomba rehetra hitangirihana vola kanefa ny tamberin'andraikitra tsy hita. Hasiana hetra 0,5% ny fifindram-bola amin'ny finday, tsabahana ny hetran-trano,... Ny fitantanana anefa tsy manjary, manjaka ny kolikoly raha tsy hilaza afatsy ny resaka lalana, ny afera maloto amin'ny tsenambaro-panjakana,...
Toky R