Kandida Paraina Auguste

Voalaza fa nahazo fampanantsoan’ny mpitandro ny filaminana, saingy tsy tonga tamin’ny fotoana nomena, ka nosamborina sy notazonina tao amin’ny Borigady misahana ny heloka bevava na BC Anosy, rantsana misahana ny heloka an’habaka na « cybecriminalité ». Ny filazana fa nahazo fampanantsoana any Londres amin’ny 30 novambra ny kandida iray noho ny raharaha kolikoly goavana nahasaringotra an’i Romy Voos Andrianarisoa no voalaza fa hanenjehana azy. Fanosoram-potaka, fanelezana vaovao tsy marina, famporisihina fankahalana ny vesatra. Tonga nanotrona sy nijery ny zava-misy momba azy ny Firaisankinan’ny kandida omaly alina. « Porofo mitohaka amin’ny tenda fa tsy misy ny fitoniana, endrikendrehana amin’ny zavatra tsy misy dikany, olon-dehibe no atao tahaka izao, ka antony mahatonga anay mijoro tahaka izao », hoy ny kandida Roland Ratsiraka, izay nilaza fa tsy maintsy mbola hotsarain’ny tantara. « Hanjaka ohatr’izao foana ny didy jadona raha tsy mandinika tsara ny Malagasy, ny azy miteniteny foana tsy misy bedy,... Tsy raharahiana ny haja amam-boninahitr’ilay olona, hoy i Marc Ravalomanana, izay nilaza fa izao no atao hoe : fanamparam-pahefana sy « terroriste d’Etat ». Tsara ny mampahatsiahy, fa efa Filohan’ny Antenimieram-pirenena, diplaomaty izay efa masoivohon’i Madagasikara tany ivelany, efa minisitra,… Atoa Paraina Auguste. Hisy ihany koa ny fanambarana hataon’ny Fikambanan’ny Sud-Est momba io raharaha io anio, raha ny vaovao azo. Andrasana ny tohiny, fa raha ny zava-nitranga dia kandida faharoa nosamborina izany ny tenany taorian-dRatsetison Jean-Jacques.

Tamin’ny 12 ora alina latsaka kely kosa no namoaka fanambarana naneho fialan-tsiny ny tenany izay naneho fa noheveriny ho voamarina tsara ny zavatra nolazainy tamin’ny 13 novambra mikasika ny fampanantsoana any Londres. Naneho fialan-tsiny tamin’ilay kandida izy, na tsy nanonona anarana aza, ary nilaza fa tsy tompon’andraikitra amin’ny fipariahan’iny intsony.
Toky R