Solontenan’ny

Vita iny ny an-drizareo te ho mpikambana tanaty governemanta sy ao anaty governemanta fa etsy ankilany, raha ny fampitàm-baovao omaly, dia misokatra koa amin’izao fotoana izao ny fanaterana dosie ho an’izay te ho solontenan’ny fiarahamonim-pirenena ao amin’ny vaomieram-pirenena mahaleotena misahana ny fifidianana na CENI. Banga hatreto ny toerana miisa 2 natokana ho amin’izany, araka ny voafaritry ny fanapahana laharana 07-HCC/D3 ny 12 martsa 2026 navoakan’ny fitsaràna avo momba ny lalàmpanorenana na HCC. Manoloana izany, ho fampiharana ny didim-panjakàna laharana 2021-867 ny 1 septambra 2021 dia miantso ireo fiarahamonim-pirenena manana fahavononana ho amin’izay andraikitra izay ny vaomiera mpikarakara fifidianana eo anivon’izay fiarahamonim-pirenena izay na «commission ad’hoc». Isan’ny andraikitra ho sahanin’ireo solontena 2 avy amin’ny fiarahamonim-pirenena ao anatin’ny CENI ny fikarakaràna fifidianana, ny fanaovana tombana mikasika ny mampety na tsia ny fanatanterahana fifidianana ary mitondra ny tenin’ny fiarahamonim-pirenena mikasika ny raharaham-pifidianana. Tsy maintsy mizaka zom-pirenena malagasy kosa ireo solontena ary tsy latsaky ny 40 taona. Anaty lisitry ny mpifidy sy tsy mbola niharana fanenjehana ara-pitsaràna. Tsy mpanao politika ary fara-faha ratsiny in-droa nandray anjara tamina raharaham-pifidianana. Anio alakamisy 26 martsa sy rahampitso 27 martsa 2026 moa no fanaterana ny antotan-taratasy mifandraika amin’izay, hoy hatrany ny fampitàm-baovao voaray.
Nangonin’i J. Mirija