ADY AMIN'NY KOLIKOLY ENY

Ivon-toerana iray ahitana karazana fanondranana sy kolikoly ny eny anivon'ny seranam-piaramanidina, indrindra fa ny eto an-drenivohitra. Mitaky fanatsarana sy fanaovana izany amin'izao Fitondram-panjakana vaovao mijoro izao ho fiarovana ny voninahitr'i Madagasikara manoloana ireo Firenena marobe any ivelany. Tsy mipetra-potsiny ny orinasa Ravinala Airports manoloana izany. Ity orinasa ity rahateo no mitantana ny seranam-piaramanidina ao Ivato sy ny ao Nosy Bé. Nanamarika ny andro manerantany iadiana amin'ny kolikoly izy ireo omaly Talata 09 Desambra. Fanentanana ireo mpiara-miasa aminy toy ny Ministeran'ny fitaterana sy ny famantarana ny toetr'andro, ny Ministeran'ny Fitsarana, ny birao mahaleo tena iadiana amin'ny kolikoly na ny Bianco ary ny Agence de recouvrement des Avoirs illicites no nivoitra nandritra izany ho fanomezana fahafaham-po ny mpandeha. Ho afaka mitoroka avy hatrany eny anivon'ny Bianco ohatra ireo mpandeha voaporofo fa niharan'ny kolikoly marina...ho an'ny seranam-piaramanidina eny Ivato. Tsotra ny tanjonay hoy Atoa Daniel Lefebvre tale jeneralin'ny orinasa Ravinala Airports dia ny hanomezana fahafaham-po ny mpandeha amin'ny lafiny rehetra. Fitaratr'i Madagasikara ny seranam-piaramanidina hoy izy no sady toerana statejika ka mendrika hisian'ny fifampitokisana, ny fiarovana ny ain'ny mpandeha sy ny fananany...Efa nametrahana QR code ihany koa ao amin'ny seranam-piaramanidina Ivato natao handraisana ny fitarainana amin'ny alalan'ny finday ho an'ireo mpandeha mivoaka sy miditra eo anivon'ity seranam-piaramanidina ity.
Pati
Légende : Nandritra ny fankalazana ny andro manerantany iadiana amin'ny kolikoly notanterahina omaly !