Ambondromifehy RN6 Tsy manaiky fisamborana ireo mpitrandraka safira

Nosakanan'ireo vahoaka mpitrandraka safira maro be ny làlana ary nikatso teo avokoa ny fiara. Voalaza fa, misy naman'ireo mpitrandraka voatifitry ny mpitandro filaminana any anaty ala any. Izay no nahatezitra azy ireo”, hoy ny fanamarihana. Ankoatra izay, nitaky ireo vahoaka mba hosokafana ho azo hitrandrahana malalaka ny ao amin'io ala fady Ambondromifehy io. Voalaza fa manao fisafoana matetika ao amin'io faritra arovana io ny MNP (Madagascar National Park) sy ny DREDD na ny Fitaleavam-paritry ny Minisiteran’ny tontolo iainana sy ny fampandrosoana lovain-jafy, ary ny mpitandro filaminana, ka misy ny mpitrandraka voalaza voasambotra. Tamin'ity, tsy nanaiky ireo olona satria nisy fitifirana, hoy ny fanamarihana. Voatery nanapoaka baomba mandatsa-dranomaso ireo zandary hanaparitahana ireo mpikomy izay nitokona nanomboka tamin'ny 8 ora maraina hatramin'ny 2 ora tolakandro, hoy ny tatitra. Tokony ary tena adidin’ny Fanjakana ny miaro ny faritra arovana, manafay ireo mpandika lalàna minia mamotika tontolo iainana,… Fa moa ve tena mitovy ny rehetra eo anatrehan’io? Miainga avy any ambony ny ohatra satria ireny iaraha-mahita ireny ny hoe: misy depiote mpanao lalàna manome fahazoan-dàlana tsy ara-dalàna hahafahan’ny fiarany mitatitra hazo mandritra ny fotoana tsy voafetra. Ny Filohana andrim-panjakana no miteny fa izay tsy nanota taminareo no aoka hitora-bado azy. Hadihadian’ny Bianco avy eo dia tsy mamaly antso. Tsy miaro ireo vahoaka mety mamotika faritra harovana saingy mametra-panontaniana hoe: Natao ho an’iza marina ny lalàna? Iza no mpanome leson-dratsy? Mbola tany misy Fanjakana ve eto ?
Toky R