Famatsiam-bola ara-tontolo iainana Miandrandra mafy an’ilay “fonds vert” tsisy setriny

Firenena miisa 195 maneran-tany no nandray anjara tamin’io andiany faha-27 tany Sharm El Sheikh – Egypte ny 6 ka hatramin’ny 18 novambra 2022 io, ka anisany I Madagasikara ka izay ny Filohan'ny Repoblika Andry Rajoelina no nitarika ny delegasionina. Araka ny tatitra nataon’ireo mpandray anjara rehetra tamin'ny COP27 izay notarihan’ny Filohan’ny Antenimierandoholona sy Ramatoa Minisitra VINA Marie-Orléa, niray feo ny Firenena afrikana ny hanafaiganana ny famoahana ny famatsiam-bola hiadiana sy hiatrehana ny fiovan’ny toetr’andro ka isan’ireo firenena tsara toerana hisitraka izany i Madagasikara vokatry ny lahateny niavaka sy ny adisisika nataon'ny Filohan'ny Repoblika sy ireo delegasiona tonga tany an-toerana ary noho ny efa fananatsika ny PNA (Plan National d’Adaptation) sy ny CDN2 na Contribution Déterminée Nationale. Tafiditra ao anatin’izany ny adisisika mahakasika ny “pertes et dommages” izay nampiavaka manokana ity COP27 ity. Nambaran-dRamatoa Minisitra fa eo an-dalam-pikarakarana ireo antontan-taratasy hafahantsika misitraka ny famatsiam-bola avy amin’ny “Fonds vert pour le climat”…. Efa maro ny tetikasa iadiana nahazo famatsiam-bola avy amin’ny FVC, ny FEM, ny “Fonds d’adaptation” hafahantsika miatrika sy miady amin’ny fiovan’ny toetrandro, hoy hatrany ireo mpitondra. Nambara fa nandroso sosokevitra ihany koa ny Firaisamonim-pirenena hanatsarana ny fandraisan-anjaran’i Madagasikara amin’ny COP28 ary naneho hatrany ny fahavononany ny rehetra hiady ny tombotsoan’i Madagasikara manoloana ireo firenena maro. Hatreto aloha, tsy sasatry ny mangataka ny Mpitondra saingy tsy hita izay vokany, ary tsy mahaleo ny sarany aza ny vidiny raha tarafina amin’ny dia maro be izay natao. Tsy vao sambany ny Filoha no nangataka ny “fonds vert” fa toa hatrany amin’ny COP 26 io no nangatahana saingy mbola poakaty ny vokatra hatreto ?
Toky R