Actualités

ireo minisitera voakasika momba ny raharaha volamena 73,7kg tratra any Afrika Atsimo: Minisiteran’ny raharaham-bahiny, ny Minisitry ny Fitsarana, minisitry ny fiarovana, Sekreteram-panjakana miadidy ny zandarimaria, minisitry ny harena an-kibon’ny tany, minisitry ny fiterana,… raha toa ka tsy eto an-toerana ny Minisitry ny raharaham-bahiny fa any ampitan-dranomasina. Nanatrika izany ihany koa ny PAC, ACM (Aviation Civile de Madagascar), polisy mpiaro ny sisin-tany (PAF). Voatery miditra an-tsehatra ny raharaham-bahiny satria tsy eto an-toerana no nahatarana izany fa any Atsimo. Manana tanjona hamerenana ireo volamena sy ireo olon-dratsy hotsaraina eto, hoy ny Minisitry ny Fiarovana Jeneraly Léon Rakotonirina nisolo tena ny Minisitry ny raharaham-bahiny izay tsy eto an-toerana.

EFA MISY DOSIE ANY AMIN’NY PAC

 Niala teto Antananarivo, nandeha Toliara, ary milaza ny hanao solika ilay fiaramanidina, kanefa nanita-kevitra niala an’I Madagasikara, hoy ny Minisitry ny Fitsarana Atoa Jhonny Richard Andriamahefarivo. Tamin'ny 31 desambra dia efa nisy fitoriana (Plainte) noho ny afera maloto mikasika ny sasany amin’ireo olona ireo teny amin’ny PAC tamina heloka mitovitovy amin’izao, kanjo nisy an'io ihany koa. Ny olona kely amintsika, tsy misy fifanarahana ara-pitsarana amin'i Afrika Atsimo isika amin’ny toe-javatra tahaka izao, fa kosa nanao sonia ny fifandraisana maneran-tany momba ny raharaha ady heloka, afaka mangataka amin'ny Firenena Afrikanina Tatsimo satria entana avy eto, ary Malagasy no nitondra ilay izy. Hanao fangatahana Iraisam-pirenena ahafahana mandefa azy aty Madagasikara (extradition) sy hamerenana ireo entana, ary ahafahana ihany koa manao ny fanenjehana ireo voakasika rehetra, hoy ny Minisitry ny Fitsarana. Hiakatra fampanoavana tsy ho ela ireo roalahy, ary ny 12 janoary kosa no hotsaraina any Afrika Atsimo ireo telo. Nilaza ny Jeneraly Ravalomanana fa ny Minisiteran'ny filaminam-bahoaka, dia efa nahazo ihany koa fampahafantarana ny 01 janoary. Nambaran’io jeneraly io, fa tsisy fisavan'ny Polisy misahana ny sisin-tany (PAF), ny fahasalamana, ny ladoany, ary tsy tokony ho afaka nivoaka teto mihitsy io fiaramanidina io, fa tena nivoaka an-tsokosoko. Nambarany fa vao niseho iny dia niantso azy ny Filoha ny 2 janoary maraina mba hanao famotorana, hijerena hoe iza no tafiditra ary izaho na iza na iza tafiditra amin'io dia ataovy ny fanenjehana, hoy ny filoha, fa tsy hisy indrafo, araka ny fitantarany. Efa tratra ny alarobia teo moa no tratra i Iandry Nirina Rasamoelina, ilay iray fahadimy farany tamin’ireo nanondrana mivantana. Ho tratra tokoa ve ny tena atidoha sa ny irakiraka ihany no atao sorona ?

Toky R