Fampihorohoroana, fanamelohana, fanagadrana

Nilatsaka ny sazy manameloka azy enim-bolana sazy mihantona .Nampangaina ho nanao hetsika tsy nahazoana alalana sy namoaka sazy tsy nierana tao amin’ny faritry ny hopitaly HJRA ity mpitarika sendika ity. Nisy moa ny hetsika nataon’izy ireo ny volana martsa lasa teo nentina nanamafisana ny fitakiana ny zony, ka nanapahana fa tsy hisy afatsy fiandrasan-draharaha na « service minimum » tamin’ny 20 martsa lasa teo, saingy natao tsara ambin’ny mpitandro ny filaminana ny vavahadin’ny HJRA, niafara tamin’ny fitoriana sy fanamelohana. Tsy afa-po tamin’ity didim-pitsarana ity ny filohan’ny sendikan’ny paramedy, izay milaza hampakatra ny didy ka andrasana ny tohiny. Manamafy hatrany ny fanampenam-bava ankolaka ireo mpitarika sendika na mpitarika fihetsiketsehana samihafa itony. Mbola manan-draharaha ara-pitsarana hatramin’izao ohatra ireo mpitarika ireo mpitarika sendika dia ny Sekretera Jeneralin’ny Randrana Sendikaly Barson Rakotomanga sy ny Filohan’ny SECES Antananarivo Pr Ravelonirina Sammy Grégoire izay efa nohelohina 30 volana sazy mihantona saingy nampiakatra ny raharaha tamin’ny fitsarana ambony, ka miandry didy raikitra. Raha hiverenana, nampangàna ho niantso ny tafika hikomy izy ireo rehefa nanatitra taratasy fiantsoana ny tafika handray andraikitra manoloana ny korontana ara-politika niseho ny taona 2023, ka nilatsaka ny didim-pitsarana nanameloka azy ireo ny febroary 2024. Nihemotra hatrany didy raikitra avy amin’ny Fitsarana ambony, ka raha tokony ho tamin’ny zoma 25 aprily teo, dia mihemotra amin’ny 02 mey indray. Raha mbola manohy ireo hetsika sy tolona sendika samihafa ny iray, dia tsapa ho somary nangina tanteraka ny iray. Vao tsy ela fa ny 01aprily teo no nohelohina sazy mihantona 3 taona ny kolonely Fanampera izay nitarika hetsika nanoherana ny Base Toliara. Fitarihana olona hidina an-dalambe tsy nahazoana alalana, fitarihan'olona hikomy, fanimbana fitaovam-panjakana, fikasihan-tànana mpitandro ny filaminana, no vesatra niampangana azy. Raha izany vesatra sy fiampangana izany tokoa no mitombina, tsy vitan’ny sazy mihantona fa toa manamafy ilay hoe : izay mihetsika dia mahita faisana. Tahaka izany ihany koa ireo olona 3 nosamborina tao Vatomandry tamin’ny lanonam-pametrahana samboadin’ireo ben’ny tanàna vao roatokombolana lasa izay ka naiditra am-ponja vonjimaika satria notondroina ho mpanakorontana, ny rotaka tao Toliara nisiana fisamborana olona 6 sy naharatrana 2 vao ny alahady 27 aprily teo,… Mirangaranga hatrany ny fanenjehana, daroka lakrimozenina, fisamborana, fanagadrana,… Izany no nampifitsaka sy mahatonga ny antoko mpanohitra ho mangingina ? Mbola tany demokratika ve i Madagasikara sa efa lasa fonjabe mitafo lanitra ?
Toky R