Fanohanana iraisam-pirenena

Manamafy ny fanohanany an’i Madagasikara ireo firenena eoropeana taorian’ny antso nataon’ny manampahefana malagasy, eo ambany fitarihan’ny Filohan’ny Refondation de la République, Kolonely Randrianirina Michaël, sy ny Praiminisitra Herintsalama Rajaonarivelo. Mitohy ny fahatongavan’ireo fanampiana ara-pitaovana vonjy taitra ho fanohanana ny mponina traboina sy hanamafisana ny ezaka fanarenana. I Alemaina nandefa fitaovana ara-lojistika sy ara-pahasalamana, ahitana 1 280 tsihy fandriana, 1 000 sivana rano Katadyn, 500 tranolay fianakaviana avy amin’ny HCR ary 1 000 kitapo fandrahoan-tsakafo, izay natao hanatsarana ny fepetra fonenana vonjimaika sy hanomezana rano fisotro madio. Belzika kosa dia nifantoka tamin’ny fandriana sy ny fiarovana amin’ny hatsiaka, ka nandefa 2 175 bodofotsy, 1 950 fandriana tsihy ary 500 fandriana miforitra, hanamafisana ny fahafahan’ny foibe fandraisana vonjy taitra mandray olona maro. Frantsa dia nanampy tamin’ny fandefasana 1 000 bodofotsy fanampiny, 204 tranolay fianakaviana ary 250 000 takelaka fanadiovana rano, natao hisorohana ny loza ara-pahasalamana vokatry ny fisotroana rano tsy madio. Ny fandraisana ofisialy ireo entana dia natao teo anatrehan’ny Talen’ny Kabinetra sivily ao amin’ny Primatiora, ny Prefen’i Toamasina, ary ny tompon’andraikitra ao amin’ny foibe fandrindrana an’ny BNGRC. Hampiely avy hatrany any amin’ireo tokantrano marefo indrindra ny fanampiana. Ny an’ny Tandrefana izay, fa nisongadina ihany koa ny fanampiana sesilany avy amin’ny Rosianina satria ankoatra ilay angidimby raitra sy fiara matanjaka, dia mbola niampy izany fitaovana izany, niaraka tamin’ny fanampiana 60 taona nahitana vary, tsaramaso mena, menaka,… Ny irariana dia tena ho tsara tantana sy hipaka amin’ny vahoaka traboina sy hiteraka fiarenana sy fanorenana ara-toekarena.
Toky R