Faritra Vatovavy

Namoaka fanapahana ny Faritra Vatovavy fa miato avokoa ny asa fitrandrahana harena an-kibon’ny tany ao amin’ny faritra. Tanjona ny fanarenana sy fanadiovana ny sehatra fitrandrahana mba hahazoana antoka fa manampy amin’ny fampandrosoana maharitra ny asa ara-toekarena. Araka ny fanazavana anatin’ny taratasy nosoniavin’i Dr. Hanitriniaina Elys K., Lehiben’ny Faritra Vatovavy, manana harena an-kibon’ny tany be dia be ny faritra saingy tsy nahazo tombontsoa ara-toekarena ny mponina hatramin’izay. Noho izany, ny fampiatoana dia natao hanamafisana ny fitantanana tompon’andraikitra sy ny fanarahana ny lalàna. Hojerena akaiky ny fahazoan-dalana sy ny fepetra ara-tontolo iainana amin’ireo orinasa miasa amin’ny sehatra ary tsy maintsy manatanteraka ny adidy sosialy sy ny fanampiana ny mponina manodidina ireo mpitrandraka. Nanamafy ihany koa ny Lehiben’ny Faritra fa ny fiaraha-miasa amin’ny sehatra tsy miankina sy ny fanjakana dia mbola ho fototra amin’ny fampandrosoana rehefa voahaja tanteraka ny fitsipika. Ity hetsika ity dia manamarika fivoarana lehibe amin’ny fitantanana ny harena voajanahary eto Madagasikara ary mety hiteraka fahazavana sy mangarahara amin’ny sehatra fitrandrahana, fampandrosoana mifototra amin’ny fiaraha-miasa amin’ny mponina ary fampihenana ny fahasimban’ny tontolo iainana. Niteraka adihevitra maro teo amin’ny mpitrandraka, ny tompon’andraikitra ary ny fikambanana mpiaro ny tontolo iainana ny fanambarana ary maro no mihevitra fa dingana ilaina izany mba hanombanana indray ny fifandanjan’ny tombontsoa ara-toekarena indrindra eny ifotony sy ny fiarovana ny tontolo iainana. Faritra anisan'ny misy volamena, safira, bauxite, quartz,... i Vatovavy.
Toky R