Actualités

Minisitry ny Foloalindahy, Andriamatoa Hassan ALIBAKHSI, Ambasadaoron'ny Repoblika Islamikan’i Iràna, miasa sy monina eto Madagasikara, omaly alarobia faha 7 febroary 2024, araka ny fampahafantarana nataon’ny Minisiteran’ny Fiarovam-pirenena. Anton-diany tamin’izany ny nitondra teny fiarahabana ny Minisitra noho ny fanendrena azy amin’izao andraikitra goavana izao. Noresahana nandritra ny fihaonana ihany koa ny fahavononan’ny Firenena Iranianina hanokatra fiaraha-miasa ara-tafika amin'i Madagasikara; ka hojerena amin’izany ireo sehatra rehetra azo hifanomezan-tanana, mba hampisy fifandraisana bebe kokoa amin'ny tany roa tonta, hoy ny fampitam-baovao. Mandondom-baravarana izany ny Iranianina. Stratejika be moa ny resaka tafika, fa ny tsikaritra dia manamafy ny fifamatorana amin’i Madagasikara amin’io lafiny io ny Firenen-dehibe, ka lohalaharana ny Frantsay, manamafy ny azy ny Amerikanina, tsy miala lavitra ny sinoa,… Ny 30 janoary, nihaona tamin’ny Minisitry ny Fiarovana ihany koa ny Ambasadaoron’ny Firenena Amerikana miasa sy monina eto Madagasikara, Ramatoa Claire Pierangelo. Fiarahabana sy firarintsoa noho ny fisahanana andraikitra vaovao no nantefainy tamin’ny Minisitra nandritra izany fotoana izany. Niara-dia taminy tamin’io tompon’andraikitry ny Fiarovana eo anivon’ny Masoivohon’izy ireo eto amintsika “Commander” Jeffrey Schwamb ka nohamafisina fa mpiara-miombon'antoka ara-miaramila efa hatrizay ny Amerikanina. Maro ny sehatra nambara fa iarahan'ny roa tonta miasa, toy ireo fanofanana miaramila malagasy ho an'ny Tafika telo, an-tanety sy an'habakabaka, ary an-dranomasina; ka isan-taona dia misy ny fanazaran-tena iombonan’ny roa tonta. Manampy ny Tafika malagasy amin’ny fanatsarana ireo fotodrafitrasa miaramila izy ireo, isan’ireo efa nisitraka izany Tafika an-dranomasina any Antsiranana. Eo koa ny fampianarana teny anglisy maimaim-poana ao amin’ny ivoteram-pampianarana izany eto amin’ny Minisiteran’ny Foloalindahy. Vao ny 30 janoary teo ihany koa no nitsidika ny Minisitra ny tompon’andraikitry ny fiarovana eo anivon’ny Masoivoho frantsay miasa sy monina eto amintsika, ny Kôlônely Henry-Sébastien Dupety. Miara-miasa amin’ny Tafika malagasy amin’ny fanofanana ara-teknika sy ara-miaramila atolotra ho an’ny Tafika an-tanety, sy ny Tafika an’habakabaka ary ny Tafika an-dranomasina ny Frantsay; ary milaza manampy sy manohana amin’ny fanatsarana ireo fotodrafitrasa miaramila,…
Toky R