Haja Ranjarivo

tamin’ny alalan’ny minisitry ny serasera sy ny kolontsaina tamin’izany fotoana, Lalatiana Rakotondrazafy, sy ny ekipany, raha tsy niongotra tamin’ny toerana dia tapaka tamin’ny filànkevitry ny minisitra ny alatsinainy teo fa averina amin’ny andraikitra maha talen’ny OMDA na ny ofisim-pirenena misahana ny zon’ny mpamorona ihany ny taleny tamin’izany fotoana, Haja Ranjarivo. Na dia teo aza, raha tsiahivina, tamin’izany fotoana izany ny fanoherana mahavaivay nataon’ireo artista, mpamorona, mpanakanto maro mba tsy hanekena ny fanesorana ity tale ity teo amin’ny toerany dia tsy navelan’io minisitra io sy ny ekipany raha tsy voahongotra tamin’izany toerany izany ity tale ity. Tsiahivina ihany koa fa manam-pahaizana manokana momba ny zon’ny mpamorona mihitsy ity tale ity ary maro ireo tetikasa sy fanavaozana nentiny tao anatin’izay tontolon’ny famorononana sy ny zon’ny mpamorona eto Madagasikara izay, hoy ny fanazavàna voaray avy amin’ireo mpanakanto niaro azy tamin’izany fotoana izany. Ankoatra azy moa dia isan’ny nongotana tamin’ny fomba nampametra-panontaniana maro tamin’izany fotoana izany koa ny tale jeneralin’ny OMACI na Ofisim-pirenena momba ny sarimihetsika. Ity rafitra voalaza farany ity aza moa dia nosoloina mihitsy hatramin’ny anarany. Andrasana ihany koa, araka izany, ny tohiny.
Nangonin’i J. Mirija