Kakao malagasy

Mbola voahosotra ho Kakao tsara kalitao indrindra eran-tany ny kakao malagasy araka ny voarakitra anatin’ny lisitr'ireo firenena ao anatin'ny « Tovana C » navoakan’ny Vondrona iraisam-pirenena misahana ny kakao (ICCO) ny Alakamisy 12 Oktobra 2023. Mitombo laza erantany indray ny kakao malagasy ary misy fiantraikany amin'ny eo amin'ny tsena iraisam-pirenena izany. Indrindra fa efa nahitana fiakarany be ny vidin'ny kakao eny amin'ny mpamboly. Tsiahivina fa nampiantrano ny fivoriana lehibe iraisam-pirenena teo amin’ireo manam-pahaizana manokana momba ny kakao tsara kalitao indrindra i Madagasikara tamin’ny 13 ka hatramin’ny 14 Jona tamin'ity taona 2023 ity. Nandray anjara tamin'izany ireo manam-pahaizana 12 mianadahy avy amin’ny rafi-panjakana sy sehatra tsy miankina misolo tena ireo firenena mpamokatra sy mpanjifa kakao. Nandalo teo anatrehan’izy ireo ny atontan-kevitra momba ny kakao tsara kalitao indrindra (cacao fin) vokatra eto Madagasikara. Nandrafitra ny soso-keviny ny mpitsara iraisam-pirenena tamin'izay ka nandefa izany tany amin’ny ICCO any Abidjan Côte d’Ivoire, ary namoaka fa ny vokatra kakao malagasy no mbola tsara kalitao indrindra.

J.Mirija