Maro no efa leo any anaty rafi-panjakana Misy mamoaka indray ny dosie « saropady »

tsy te hinia hikipy intsony eo anatrehan’ny afera maloto sy fanjakazakana. Tao anatin’ny andro vitsy, niparitaka ny dosie mikasika ny Ben’ny tanànan’Antananarivo sy ny orinasany mombana ahiahy famotsiam-bola mifandrohy amin’ny fanafarana t-shirts nampiasain’ny kandida Filoham-pirenena tamin’izany Atoa Camille Vital, ka nandefasan’ny Tale Jeneralin’ny SAMIFIN tamin’ny fotoan’androny tatitra tamin’ny tonia mpampanoa lalàna ambony teo anivon’ny PAC (Pôle Anti-Corruption) araka ny taratatasy mitondra ny laharana 001/SAMIFIN/DG/14 ny 12 martsa 2014. Tsy tongatonga ho azy ny fivoahan’ny dosie efa nipirina tahaka ireny aty amin’ny taona 2022 fa ao raha. Isan’ny tratry ny kiana maro momba ny fifampidirana ara-bola teo amin’ny CNaPS sy Kaominina ihany koa ny tenany,... Efa nisy ihany koa tany aloha ny ampamoaka nataon’Atoa Ravo Nambinina izay mpikirakira ny resaka tsenambaro-panjakana tao amin’ny Minisiteran’ny fahasalamana. Nambarany ny 18 aprily 2021 fa 730 tapitrisa no lany nandokoana hopitaly manarapenitra miisa 7; vola 980 tapitrisa Ar no nanaganana "centre de transplantation rénale" ao amin'ny CHU Andohatapenaka ka dosie piraty no nampiasana; volan'ny ministeran'ny fahasalamana mitetina 44 miliara Ariary no nalaina ary tsy naverina manontolo ny taona 2020,… Nanao sorona ny tenany izy satria heverina fa tofoka sy leo tamin’ny tsy fanjariana, tsy te hinia mikipy, ary ireny niaraha-nahita ireny, fa nohenjehina sy nohelohin’ny Fanjakana. Tato aoriana, niporitsaka ihany koa ny raharaha voamboanan’ny depiote Lanto Rakotomanga izay nipariahan’ny taratasy miendrika fisandohan’andraikitra manome alalana ny fiarany hitatitra hazo amin’ny fotoana tsy voafetra. Mpitandro ny filaminana no voalaza fa niaingan’ny fipoahan’ny raharaha satria leo tsindritsindry sy ramatahora. Na mbola tsara aro aza ity depiote ity, mba mahavelom-bolo kely satria hazo voamboana mahatratra 96 sy hazo tsotra 120 avy tany amin’ny Faritr’i Didy indray no tratra vao andro vitsy. Ny eny amin’ny seranam-piaramanidina, betsaka no efa tofoka sy leo eo anatrehan’ny fanararaotam-pahefana, ny trafika amin’ny endriny samihafa,… kanefa tsy maintsy minia mikipy. Ampahany ireny fa betsaka ny sehatra ahatarafana an’io, tahaka ny fahitana trafika samihafa sy ny fanararaotan’ny manam-pahefana eny amin’ny seranam-piaramanidina, izay maro ny mpiasa voatery minia mikipy satria mena ambanin’ny mena, saingy ahazoana vaovao samihafa.
MARO NY TOFOKA ANY ANATY RAFI-PANJAKANA
Matoa manomboka mivoaka ny tsiambaratelo maro momba ny afera hafahafa, dia midika fa efa maro no tofoka sy leo na “frustré” na tsy maneho izany mivantana aza. Leo fambotriana firenena sy fangoronan-karena mihoampampana satria mba maro ihany ny tia tanindrazana eto. Efa betsaka ny tonga saina any anaty rafi-panjakana samihafa any. Hatreto aloha mbola eo am-pelantanana ny fahefana, afaka mirehareha, afaka manao tsindry, vao mainka mitombo ny afera, saingy mety ho henjana ny vokatr’io amin’ny andro iray. Betsaka mantsy ny mieritreritra fa manangona be, mangorona be, mandray fiaramanidina raha sanatria misy ny atambo dia mihinana ny azo any ivelany. Sao mba ho diso kajy ?
Toky R